ایک بازو سے محروم فوڈ ڈیلیوری رائیڈر سوشل میڈیا صارفین کی توجہ کا مرکز بن گیا

ملائیشیا سے تعلق رکھنے والا فوڈ ڈیلیوری رائیڈر احمد نبیل رسولی ایشیا بھر میں سوشل میڈیا صارفین کی توجہ کا مرکز بن گیا ہے۔ 26 سالہ احمد نبیل مئی 2017 میں ایک خوفناک ٹریفک حادثے میں اپنا بایاں بازو کھو بیٹھے تھے۔

نومبر 2025 میں ایک ویڈیو وائرل ہوئی جس میں انہیں موٹر سائیکل چلاتے ہوئے ایک چیک پوائنٹ پر ٹریفک پولیس اہلکار نے روکا اور ان کے بازو سے متعلق سوال کیا۔ احمد نبیل نے بتایا کہ حادثے میں ان کی موٹر سائیکل پھسل گئی تھی اور آگ لگنے سے وہ شدید زخمی ہوئے، حتیٰ کہ آدھے گھنٹے تک دل کی دھڑکن بھی رک گئی اور وہ کوما میں چلے گئے۔

احمد نبیل کے مطابق یہ ان کی زندگی کا سب سے مشکل وقت تھا، تاہم ہاتھ سے محرومی کے باوجود انہوں نے اسے زندگی کا دوسرا موقع سمجھا اور محنت و حوصلے کے ساتھ آگے بڑھنے کا فیصلہ کیا۔