فیفا ورلڈکپ: سٹیڈیم آنے والے شائقین پر بڑی پابندی عائد

نیویارک: فٹ بال کی عالمی گورننگ باڈی (FIFA) نے فیفا ورلڈ کپ 2026 کے باقاعدہ آغاز سے چند دن قبل ایک بڑا فیصلہ کرتے ہوئے شائقینِ فٹ بال کے اسٹیڈیم میں دوبارہ استعمال ہونے والی (Reusable) پانی کی بوتلیں ساتھ لانے پر مکمل پابندی عائد کر دی ہے۔

عالمی خبر رساں ادارے کے مطابق، فیفا کا یہ چونکا دینے والا فیصلہ اسٹیڈیم کے ضابطہ اخلاق (Code of Conduct) میں آخری وقت میں کی جانے والی ایک اہم تبدیلی کے بعد سامنے آیا ہے۔

فیفا کی جانب سے اس سے قبل شائقین کو کچھ رعایت دی گئی تھی، تاہم اب سیکیورٹی پروٹوکولز کو مزید سخت کر دیا گیا ہےابتدائی طور پر فیفا نے شائقین کو اس بات کی اجازت دی تھی کہ وہ اسٹیڈیم کے اندر شفاف اور بالکل خالی پلاسٹک کی ری یوزایبل بوتلیں ساتھ لا سکتے ہیں۔منگل کے روز سے نافذ العمل ہونے والے نئے اور سخت ضابطے کے تحت اب ایسی تمام بوتلوں کے اسٹیڈیم میں داخلے کو مکمل طور پر ممنوع قرار دے دیا گیا ہے۔ فیفا انتظامیہ کا مؤقف ہے کہ بوتلیں، کپ، جار اور کین جیسی سخت اشیاء کو اگر کسی اشتعال یا جوش میں میدان کے اندر پھینکا جائے، تو اس سے کھلاڑیوں اور وہاں موجود تماشائیوں کے شدید زخمی ہونے کا خطرہ ہوتا ہے۔ اسی سیکیورٹی رسک کے پیشِ نظر یہ حفاظتی اقدام اٹھایا گیا ہے۔

فیفا کا کہنا ہے کہ میچز کے دوران کھلاڑیوں، ریفریز، رضاکاروں، آفیشل عملے اور شائقین کی فول پروف حفاظت اس کی اولین ترین ترجیح ہے۔ ادارے نے مزید واضح کیا کہ بعض میزبان اسٹیڈیمز کی انتظامیہ نے پہلے ہی بیرونی بوتلوں پر پابندی عائد کر رکھی تھی، جسے اب کسی بھی ابہام سے بچنے کے لیے پورے ٹورنامنٹ میں یکساں طور پر نافذ کر دیا گیا ہے۔

دوسری جانب، فیفا کے اس اچانک فیصلے پر فٹ بال شائقین کی بڑی تعداد نے شدید تشویش کا اظہار کیا ہے۔ شائقین کا کہنا ہے کہ ٹورنامنٹ کے دوران شدید گرم موسم میں پانی کی مسلسل دستیابی ایک بڑا چیلنج بن سکتی ہے، کیونکہ بعض میزبان مقامات پر درجہ حرارت 26 سے 28 ڈگری سینٹی گریڈ تک رہنے کی توقع ہے۔

شائقین کی اس تشویش پر فیفا نے یقین دہانی کرائی ہے کہ اسٹیڈیمز کے اندر اور اطراف میں شائقین کے لیے مسٹنگ اسٹیشنز (Misting Stations)، ہائیڈریشن پوائنٹس، کولنگ ٹینٹس اور پینے کے صاف پانی کی دیگر تمام ضروری سہولیات وافر مقدار میں فراہم کی جائیں گی تاکہ تماشائیوں کو کوئی تکلیف نہ ہو۔

واضح رہے کہ تاریخ میں پہلی بار 48 ٹیموں پر مشتمل یہ بڑا فیفا ورلڈ کپ 11 جون سے 19 جولائی (2026) تک امریکا، کینیڈا اور میکسیکو کی مشترکہ میزبانی میں منعقد ہونے جا رہا ہے، جس کے لیے تیاریاں آخری مراحل میں داخل ہو چکی ہیں۔