ایرانی فٹبال ٹیم اپنے گروپ میچز شیڈول کے مطابق امریکا میں کھیلے گی، فیفا صدر

فیفا کے صدر جیانی انفینٹینو نے واضح کر دیا ہے کہ ایران کی فٹ بال ٹیم ورلڈ کپ 2026 کے اپنے گروپ میچز شیڈول کے مطابق امریکہ ہی میں کھیلے گی۔ ترکیہ میں ایران اور کوسٹاریکا کے درمیان ہونے والے فرینڈلی میچ کے دوران میڈیا سے گفتگو کرتے ہوئے انہوں نے تصدیق کی کہ ایرانی ٹیم 15 جون کو لاس اینجلس سے اپنی عالمی مہم کا آغاز کرے گی۔

فیفا صدر کا یہ بیان ایسے وقت میں سامنے آیا ہے جب امریکی صدر ڈونلڈ ٹرمپ نے گزشتہ دنوں اپنے بیان میں کہا تھا کہ موجودہ جنگی حالات میں ایرانی ٹیم کا امریکہ آنا مناسب نہیں ہوگا۔ دوسری جانب، ایران کے وزیرِ کھیل نے بھی اپنی ٹیم کو ‘مخالف ممالک’ کے سفر سے روکنے کا اشارہ دیا تھا۔ تاہم، جیانی انفینٹینو نے ان تمام تحفظات کو پسِ پشت ڈالتے ہوئے کہا کہ وہ ایران کی شرکت پر خوش ہیں کیونکہ ایران ایک “بہت اچھی ٹیم” ہے اور فٹ بال کا جشن تمام رکاوٹوں سے آزاد ہونا چاہیے۔

کھیلوں کے تجزیہ نگاروں کے مطابق، فیفا کا یہ فیصلہ اس بات کی علامت ہے کہ عالمی فٹ بال ریگولیٹر کھیلوں کو سیاسی اور فوجی تنازعات سے دور رکھنے کی پالیسی پر سختی سے کاربند ہے۔ لاس اینجلس میں ہونے والے اس میچ پر اب پوری دنیا کی نظریں لگی ہوئی ہیں، جہاں سکیورٹی کے غیر معمولی انتظامات متوقع ہیں۔