ریڈ کارڈ معطلی کا معاملہ، یورپی ارکانِ پارلیمنٹ کا سربراہ فیفا کیخلاف تحقیقات کا مطالبہ

یورپی ارکانِ پارلیمنٹ نے امریکی صدر ڈونلڈ ٹرمپ کی سفارش پر امریکی اسٹرائیکر فولارین بالوگن کی ورلڈ کپ معطلی اور ریڈ کارڈ ختم کرنے کے متنازع فیصلے پر فیفا کے سربراہ جانی انفانٹینو کے خلاف باقاعدہ تحقیقات کا مطالبہ کر دیا ہے۔ خبر رساں ایجنسی کے مطابق، یورپی قانون سازوں نے امریکی صدر کی مداخلت کے بعد بالوگن کی معطلی منسوخ کرنے کے فیفا کے فیصلے کو انتہائی شرمناک قرار دیا ہے۔ یورپی پارلیمنٹ کے ارکان کے ایک گروپ نے اس حوالے سے گزشتہ روز ایک باقاعدہ مہم کا آغاز کیا ہے، جس میں ان کا مؤقف ہے کہ فیفا کے سربراہ انفانٹینو نے صدر ٹرمپ کے ساتھ اپنی ذاتی دوستی نبھانے اور امریکی دباؤ کے آگے جھکتے ہوئے فٹ بال کی عالمی تاریخ اور قوانین کو مسخ کیا ہے۔ اس کے ساتھ ہی یورپین فٹ بال باڈی نے بھی فیفا کے اس غیر معمولی اقدام کو یکسر ناقابلِ فہم اور بلاجواز قرار دیتے ہوئے اس پر شدید تحفظات کا اظہار کیا ہے۔

واضح رہے کہ یورپی قانون سازوں کا یہ سخت ترین مطالبہ فٹ بال کی عالمی تنظیم کی جانب سے امریکی اسٹرائیکر فولارین بالوگن کی ورلڈ کپ معطلی کو منسوخ کرنے کے بے مثال اور اچانک فیصلے کے بعد سامنے آیا ہے۔ فیفا کے اس غیر متوقع اور یکطرفہ فیصلے نے کھیل کے حلقوں میں یہ سنگین سوالات کھڑے کر دیے ہیں کہ آیا کھیل کی گورننگ باڈی کے فیصلوں پر امریکی صدر کے سیاسی دباؤ اور اثر و رسوخ نے اثر ڈالا ہے۔ یورپی ارکانِ پارلیمنٹ کا کہنا ہے کہ فٹ بال جیسے عالمی کھیل کی شفافیت کو برقرار رکھنے کے لیے اس پورے معاملے اور اس میں فیفا صدر انفانٹینو کے مبینہ کردار کی اعلیٰ سطح پر شفاف تحقیقات ہونا ناگزیر ہے۔