وفاقی آئینی عدالت کا بڑا فیصلہ: توہینِ عدالت کے مقدمات سننے کے اختیار کی توثیق، چیئرمین ڈرگ کورٹ کی اپیل خارج

وفاقی آئینی عدالت نے توہینِ عدالت کے مقدمات کی سماعت کے حوالے سے ایک اہم فیصلہ جاری کرتے ہوئے اپنے قانونی اختیارِ سماعت کی توثیق کر دی ہے۔ عدالت نے فیصلے میں واضح کیا ہے کہ آئین کے آرٹیکل 189 اور 204 اسے توہینِ عدالت کے مقدمات سننے کا مکمل اختیار دیتے ہیں اور توہین کے مرتکب افراد کے خلاف کارروائی کرنا عدالت کا بنیادی آئینی حق ہے۔ یہ فیصلہ ایک درخواست گزار کے اعتراض پر سامنے آیا جس کا موقف تھا کہ توہینِ عدالت آرڈیننس 2003 میں آئینی عدالت کا ذکر نہیں ہے، تاہم عدالت نے اسے مسترد کرتے ہوئے قرار دیا کہ آئین کا آرٹیکل 204 اس حوالے سے بالکل واضح ہے۔

اسی فیصلے کے ساتھ عدالت نے چیئرمین ڈرگ کورٹ گوجرانوالہ کی برطرفی کے خلاف دائر اپیل بھی خارج کر دی ہے۔ درخواست گزار پر بطور چیئرمین ڈرگ کورٹ کوئی مقدمہ نہ نمٹانے کا الزام تھا اور عدالت نے قرار دیا کہ انہیں قانونی طریقہ کار کے مطابق برطرف کیا گیا۔ فیصلے میں اس بات پر بھی شدید برہمی کا اظہار کیا گیا کہ درخواست گزار نے فیصلہ محفوظ ہونے کے بعد بینچ کے رکن جسٹس عامر فاروق کو خطوط لکھ کر بینچ سے الگ ہونے کا کہا۔ عدالت نے ریمارکس دیے کہ فیصلہ محفوظ ہونے کے بعد جج کو ایسے خطوط لکھنا توہینِ عدالت کے زمرے میں آتا ہے اور عدالت کارروائی کا حق رکھتی ہے، تاہم اس معاملے میں تحمل کا مظاہرہ کیا جا رہا ہے۔