بلاول بھٹو زرداری سے ازبکستان کے نووئی ریجن کے گورنر کی ملاقات

چیئرمین بلاول بھٹو زرداری سے ازبکستان کے نووئی ریجن کے گورنر نورمت تورسونوف نے وفد کے ہمراہ ملاقات کی، جس میں علاقائی روابط اور اقتصادی تعاون کے فروغ پر تفصیلی گفتگو کی گئی۔ ملاقات میں معدنیات اور توانائی کے شعبوں میں مشترکہ شراکت داری کے امکانات کا جائزہ لیا گیا اور دوطرفہ تجارتی تعلقات کو مزید مستحکم کرنے پر اتفاق ہوا۔ اس موقع پر بلاول بھٹو زرداری نے کہا کہ وسطی ایشیا کو پاکستان سے جوڑنے والی تجارتی راہداری پورے خطے کی ترقی کے لیے کلیدی اہمیت رکھتی ہے۔ ازبک گورنر نے پاکستان کو ایک بہترین دوست ملک قرار دیتے ہوئے کہا کہ باہمی تعاون کے مواقعوں میں اضافے سے دونوں ملکوں سمیت پورے خطے کو فائدہ پہنچے گا۔ وفد میں ازبک سفیر علی شیر توختائیف اور ڈپٹی گورنر البیک غفاروف بھی شامل تھے۔