ایف بی آر: انکم ٹیکس رولز میں ترامیم کی تجویز ، بزنس انٹیگریشن لازمی قرار

فیڈرل بورڈ آف ریونیو (ایف بی آر) نے انکم ٹیکس رولز 2002 میں ترمیم کی تجویز دے دی ہے، جس کے تحت انفرادی ٹیکس دہندگان کے لیے الیکٹرانک فائلنگ لازمی قرار دی جا رہی ہے۔
ترمیمی تجویز کے مطابق انکم ٹیکس ریٹرن اور ودہولڈنگ اسٹیٹمنٹ اب صرف آن لائن جمع کرانا ضروری ہوگا۔ ایف بی آر نے اس حوالے سے عوامی تجاویز اور اعتراضات سات دن کے اندر طلب کر لیے ہیں۔ایف بی آر کے مطابق یہ اقدامات ٹیکس نظام میں ڈیجیٹل شفافیت کو فروغ دینے کے لیے کیے جا رہے ہیں۔دوسری جانب ایف بی آر نے سیلز ٹیکس قوانین 2006 میں بھی ترمیم کر دی ہے اور اس حوالے سے نیا ایس آر او 2071 جاری کر دیا گیا ہے۔نوٹیفکیشن کے مطابق ایک لاکھ روپے سے زائد ودہولڈنگ ٹیکس ادا کرنے والے ریٹیلرز کے لیے بزنس انٹیگریشن لازمی قرار دی گئی ہے، جبکہ پانچ لاکھ روپے تک ودہولڈنگ ٹیکس دینے والے ریٹیلرز بھی نئے ضابطے کے دائرے میں آئیں گے۔ایف بی آر کے مطابق انٹیگریشن کا عمل سیلز ٹیکس ایکٹ 1990 کے سیکشن 43A کے تحت مکمل کیا جائے گا۔ترمیمی اقدامات کا مقصد ٹیکس وصولی کے نظام کو جدید خطوط پر استوار کرنا اور ریونیو کے بہاؤ کو مؤثر بنانا ہے