ایشین گیمز میں پاکستان کا پرچم اٹھانا فاطمہ ثنا اور نور زمان کے لیے اعزاز

جاپان میں منعقد ہونے والے ‘ایشین گیمز 2026ء’ کی باوقار افتتاحی تقریب کے لیے قومی ویمنز کرکٹ ٹیم کی کپتان فاطمہ ثنا اور نامور اسکواش پلیئر نور زمان کو پاکستان کا پرچم بردار (Flag Bearers) مقرر کیا گیا ہے۔ دونوں کھلاڑی تقریب کے دوران پاکستانی دستے کی قیادت کرتے ہوئے قومی پرچم اٹھائیں گے۔

اس اہم ذمہ داری پر اپنے جذبات کا اظہار کرتے ہوئے فاطمہ ثنا نے کہا کہ اتنے بڑے عالمی و علاقائی اسپورٹس اسٹیج پر پاکستان کا پرچم اٹھانا ان کے لیے انتہائی فخر اور اعزاز کی بات ہے جس پر وہ اللہ تعالی کا شکر ادا کرتی ہیں۔ ان کا مزید کہنا تھا کہ ملک کی نمائندگی کرنا ہمیشہ ایک خاص احساس ہوتا ہے اور ان کی پوری کوشش ہوگی کہ وہ آئندہ بھی پوری محنت اور لگن کے ساتھ پاکستان کا نام روشن کرتی رہیں۔ واضح رہے کہ ایشین گیمز کی باقاعدہ اور پروقار افتتاحی تقریب کل جاپان میں منعقد ہو رہی ہے۔