اُلوؤں کو بھگانے کا انوکھا مگر پُراسرار طریقہ، خالی پلاٹوں میں بلیوں کے کٹ آؤٹس نصب

امریکی ریاست فلوریڈا کے شہر کیپ کورل میں نایاب نسل کے زمین دوز اُلوؤں کو ڈرانے اور علاقے سے دور رکھنے کے لیے خالی پلاٹوں میں نقلی بلیوں کے پراسرار کٹ آؤٹس نصب کر دیے گئے۔ جنگلی حیات کے ماہرین اور مقامی رضاکاروں کے مطابق حال ہی میں فروخت ہونے والے دو پلاٹوں میں بلیوں کے یہ کٹ آؤٹس لگائے گئے ہیں، جن میں سے ایک جگہ اُلو کے بل کے قریب چھ نقلی بلیاں موجود ہیں۔ خدشہ ظاہر کیا جا رہا ہے کہ نئے مالکان نے تعمیراتی کام شروع کرنے سے قبل مزید اُلوؤں کو وہاں بسیرا کرنے سے روکنے کے لیے یہ طریقہ اپنایا ہے، کیونکہ بلیاں ان پرندوں کی بڑی شکاری سمجھی جاتی ہیں۔ واضح رہے کہ فلوریڈا میں زمین کے اندر بل بنا کر رہنے والے ان اُلوؤں کو وفاقی قانون کے تحت تحفظ حاصل ہے اور حکام کی اجازت کے بغیر ان کے بلوں کو نقصان پہنچانا یا انہیں بے دخل کرنا غیر قانونی ہے۔ وائلڈ لائف کی تنظیم کے رضاکاروں نے شہریوں سے اپیل کی ہے کہ وہ نایاب پرندوں کے تحفظ کے لیے اپنی پالتو بلیوں کو بھی گھروں کے اندر رکھیں