چوری کی ناکام واردات، دیوار میں پھنسے چور کو پولیس نے نجات دلائی

بھارت میں چوری کی ایک ناکام واردات اس وقت دلچسپ واقعے میں بدل گئی جب ایک مبینہ چور گھر میں داخل ہونے کی کوشش کے دوران کچن کے ایگزاسٹ سوراخ میں بری طرح پھنس گیا۔ یہ غیر معمولی واقعہ ریاست راجستھان میں پیش آیا، جس کی ویڈیو سوشل میڈیا پر تیزی سے وائرل ہو رہی ہے اور صارفین اس پر حیرت اور مزاحیہ تبصرے کر رہے ہیں۔

بھارتی میڈیا کے مطابق ملزم سبھاش کمار راوت کے گھر چوری کی نیت سے داخل ہوا، تاہم باورچی خانے کے ایگزاسٹ پنکھے کے شافٹ میں اٹک گیا اور تقریباً ایک گھنٹے تک اسی حالت میں لٹکا رہا۔ واقعے کے وقت گھر کے مالک کھاٹوشیام جی گئے ہوئے تھے۔

اگلے روز دوپہر کے وقت جب سبھاش کمار راوت کی اہلیہ گھر واپس آئیں اور مین گیٹ کھولا تو کچن کی جانب دیکھ کر حیران رہ گئیں۔ انہوں نے دیکھا کہ ایک شخص ایگزاسٹ کے سوراخ میں اس طرح پھنسا ہوا ہے کہ اس کا آدھا جسم گھر کے اندر اور آدھا باہر کی طرف تھا۔

پولیس کے مطابق دو ملزمان واردات میں ملوث تھے۔ شور سنائی دینے پر ایک ملزم فرار ہو گیا جبکہ دوسرا بدقسمتی سے ایگزاسٹ میں پھنس گیا۔ بعد ازاں پولیس کو اطلاع دی گئی، جس نے موقع پر پہنچ کر ملزم کو نکال کر حراست میں لے لیا۔