حکومت کا بڑا معاشی ریلیف: برآمدی سامان پر ایکسپورٹ ڈویلپمنٹ سرچارج ختم

اسلام آباد: وفاقی حکومت نے برآمدی سامان پر عائد ایکسپورٹ ڈویلپمنٹ سرچارج ختم کرنے کا فیصلہ کرلیا ہے اور اس کے فوری اطلاق کا نوٹیفکیشن بھی جاری کردیا گیا ہے۔
مشیر برائے وزیرِ خزانہ خرم شہزاد نے بتایا کہ اسٹیٹ بینک آف پاکستان نے بھی اس اقدام کے ساتھ ہم آہنگی پیدا کرتے ہوئے اس حوالے سے جاری سابقہ سرکلر لیٹرز واپس لے لیے ہیں۔

خرم شہزاد کے مطابق نجی شعبے کی قیادت میں بنائے گئے ورکنگ گروپس کے نتائج تیزی سے سامنے آ رہے ہیں اور وزیراعظم کے فیصلے پر فوری اور مؤثر عملدرآمد شروع ہوچکا ہے۔

انہوں نے کہا کہ سرچارج کے خاتمے سے ملکی برآمدات کو براہِ راست فائدہ ہوگا اور کاروباری لاگت میں نمایاں کمی آئے گی، جو عالمی مارکیٹ میں پاکستان کی مسابقت کو بڑھانے میں اہم کردار ادا کرے گی۔
مشیرِ خزانہ نے مزید کہا کہ حکومت کا مقصد برآمدی شعبے کو سہولت فراہم کرنا، آپریشنل اخراجات کم کرنا اور معاشی سرگرمیوں میں تیزی لانا ہے۔

معاشی ماہرین کا کہنا ہے کہ اس فیصلے سے برآمدی صنعت کو خاطر خواہ سہولت ملے گی اور مستقبل قریب میں برآمدات میں اضافے کا امکان ہے۔