برطانیہ سے علیحدگی کے لیے گاؤں کا علامتی ریفرنڈم

انگلینڈ کے ایک چھوٹے سے گاؤں پیڈنگٹن کے رہائشیوں نے قریبی سابق فوجی اڈے پر تقریباً 1,200 پناہ گزینوں کو منتقل کرنے کے حکومتی منصوبے کے خلاف انوکھا احتجاج کرتے ہوئے برطانیہ سے علامتی طور پر علیحدگی کے حق میں ووٹ دے دیا ہے۔ تقریباً 350 نفوس پر مشتمل اس گاؤں میں منعقد ہونے والے غیر حتمی اور نان-بائینڈنگ ریفرنڈم کے نتائج کے مطابق 285 افراد نے برطانیہ سے علیحدگی کی حمایت کی جبکہ صرف 26 افراد نے اس کی مخالفت میں ووٹ دیا۔

ریفرنڈم کے نتائج کے بعد گاؤں کی پیرش کونسل کے چیئرمین ٹِم میک نیلی نے اعلان کیا کہ اس ووٹ کے ذریعے نہ صرف برطانیہ بلکہ پوری دنیا کو ایک واضح اور سخت پیغام دیا گیا ہے، اور اب گاؤں کو علامتی طور پر ’پرنسپلٹی آف پیڈنگٹن‘ (Principality of Paddington) کہا جائے گا۔ یہ احتجاج گاؤں سے محض 0.8 کلومیٹر دور سابق وزارتِ دفاع کے ’بائسیسٹر اڈے‘ میں مرد پناہ گزینوں کو ٹھہرانے کے سرکاری منصوبے کے خلاف کیا گیا۔ دوسری جانب برطانوی حکومت کا کہنا ہے کہ اس رہائشی مرکز کو مکمل طور پر خود کفیل بنایا جائے گا تاکہ مقامی آبادی متاثر نہ ہو، تاہم مقامی رہائشیوں نے واضح کیا ہے کہ یہ ووٹ قانونی طور پر الگ ہونے کے لیے نہیں بلکہ حکومتی پالیسیوں پر اپنے شدید تحفظات کا اظہار کرنے کا ایک طریقہ ہے