8 اسلامی ممالک کی غزہ میں اسرائیلی کارروائیوں کی مذمت، مشترکہ اعلامیہ جاری

پاکستان، مصر، ترکیہ، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ نے غزہ کی پٹی میں اسرائیل کی جاری عسکری کارروائیوں اور سنگین خلاف ورزیوں کی پرزور مذمت کرتے ہوئے ایک مشترکہ اعلامیہ جاری کیا ہے۔

مشترکہ اعلامیے میں کہا گیا ہے کہ غزہ میں اسرائیلی خلاف ورزیوں کا تسلسل بین الاقوامی قوانین کے تحت اس کی ذمہ داریوں اور غزہ تنازع کے خاتمے کے جامع منصوبے کی صریح خلاف ورزی ہے۔ اعلامیے کے مطابق یہ یکطرفہ اقدامات امن منصوبے کے دوسرے مرحلے پر عملدرآمد کے لیے جاری بین الاقوامی اور علاقائی کوششوں کو شدید نقصان پہنچا رہے ہیں۔ اسلامی ممالک نے واضح کیا کہ امریکی صدر ڈونلڈ ٹرمپ کے اعلان کے بعد تمام فلسطینی دھڑوں نے روڈ میپ کو قبول کر لیا تھا، تاہم اسرائیل کی تازہ کشیدگی سیاسی عمل کو سبوتاژ کرنے اور غزہ کے انسانی بحران کو مزید سنگین بنانے کا باعث بن رہی ہے۔

8 اسلامی ممالک کے وزرائے خارجہ نے خواتین اور بچوں سمیت شہریوں کی ہلاکتوں کو بین الاقوامی قانون کی سنگین خلاف ورزی قرار دیتے ہوئے مطالبہ کیا کہ غزہ میں فوری، محفوظ اور بلا رکاوٹ انسانی امداد کی فراہمی یقینی بنائی جائے اور طبی مراکز، طبی عملے و امدادی کارکنوں کا ہر صورت تحفظ کیا جائے۔ اعلامیے میں اقوامِ متحدہ کی سلامتی کونسل سے مطالبہ کیا گیا کہ وہ اسرائیل کو بین الاقوامی قانون کا پابند بنائے اور اسے تمام سنگین خلاف ورزیوں پر جوابدہ ٹھہرائے۔ اعلامیے کے اختتام پر 1967 کی سرحدوں کی بنیاد پر مشرقی یروشلم کو دارالحکومت بناتے ہوئے آزاد اور مستقل فلسطینی ریاست کے قیام کو خطے میں دیرپا امن کا واحد حل قرار دیا گیا۔