انگلینڈ کرکٹ ٹیم کے سکیورٹی وفد کا پنجاب سیف سٹیز اتھارٹی کا دورہ

پاکستان کرکٹ بورڈ (پی سی بی) کے حکام کے ہمراہ انگلینڈ کرکٹ بورڈ (ای سی بی) کے ۵ رکنی سکیورٹی وفد نے پنجاب سیف سٹیز اتھارٹی ہیڈکوارٹرز لاہور کا دورہ کیا۔ برطانوی وفد میں ڈائریکٹر انٹرنیشنل آپریشنز روب ہل مین، ڈائریکٹر سکیورٹی ریگ ڈکاسن اور ڈیرل مچل سمیت دیگر اعلیٰ حکام شامل تھے۔ ایم ڈی سیف سٹی محمد احسن یونس اور سی او او مستنصر فیروز نے وفد کو سیف سٹیز کے جدید سرویلنس سسٹم، کمانڈ اینڈ کنٹرول میکنزم اور آرٹیفیشل انٹیلی جنس (AI) پر مبنی ویڈیو اینالیٹکس کی بریفنگ دی، جبکہ لاہور اور راولپنڈی میں آئندہ سہہ ملکی کرکٹ سیریز کے لیے مرتب کردہ سکیورٹی پلان، ٹیموں کے روٹس، ایئرپورٹ و ہوٹل کے سکیورٹی انتظامات کا تفصیلی جائزہ پیش کیا۔

دورے کے دوران برطانوی وفد نے سمارٹ سرویلنس، ڈیجیٹل مانیٹرنگ اور ریئل ٹائم مانیٹرنگ کے جدید آلات میں شدید دلچسپی کا اظہار کرتے ہوئے پنجاب سیف سٹیز اتھارٹی کے بین الاقوامی معیار کے انتظامات کو زبردست الفاظ میں سراہا۔ وفد نے قانون نافذ کرنے والے اداروں کے ساتھ سیف سٹی کے مربوط رابطے اور جدید ٹیکنالوجی کے مؤثر استعمال کی تعریف کی اور پاکستان میں محفوظ ماحول کے اندر بین الاقوامی کرکٹ مقابلوں کے انعقاد کے لیے کی گئی تیاریوں پر اپنے مکمل اطمینان کا اظہار کیا۔