نیویارک کے بینک میں ہرن کی توڑ پھوڑ: ویڈیو وائرل

نیویارک: امریکی ریاست نیو یارک کے سفولک کاؤنٹی میں 18 جنوری کو ایک حیران کن واقعہ پیش آیا، جب ایک سفید دم والا ہرن ریج بینک کی شیشے کی کھڑکی توڑ کر اندر داخل ہو گیا۔

باڈی کیم فوٹیج کے مطابق جیسے ہی ہرن بینک میں داخل ہوا، سکیورٹی الارم بجا اور پولیس فوری طور پر پہنچ گئی۔ پولیس کے داخل ہوتے ہی انہیں کسی مشتبہ شخص کے بجائے ایک خوف زدہ ہرن نظر آیا، جو کاؤنٹرز اور میزوں کے درمیان اچھل کود کر رہا تھا۔

سفولک کاؤنٹی پولیس نے رسی کی مدد سے ہرن کو قابو میں کیا، اسے پرسکون کیا اور بغیر کسی نقصان کے دوبارہ اس کے قدرتی ماحول میں چھوڑ دیا۔ خوش قسمتی سے اس واقعے میں کوئی شہری یا اہلکار زخمی نہیں ہوا۔

نیو یارک ڈیپارٹمنٹ آف انوائرمنٹل کنزرویشن کے مطابق ہر سال ریاست میں تقریباً 70 ہزار واقعات میں گاڑیاں ہرنوں سے ٹکراتی ہیں، اور ہر حادثے میں اوسط نقصان 4 ہزار ڈالر سے زائد ہوتا ہے۔ ماہرین ماحولیات کا کہنا ہے کہ جنگلات کی کمی اور شہری تعمیرات میں اضافے کے باعث جنگلی جانور محفوظ پناہ گاہ اور خوراک کی تلاش میں شہری علاقوں کا رخ کر رہے ہیں۔