ڈیوس کپ ٹائی کی جیت کا کریڈٹ کھلاڑیوں کو جاتا ہے، رشید ملک

اسلام آباد: پاکستان ڈیوس کپ ٹیم کے کپتان رشید ملک نے کہا ہے کہ ڈیوس کپ ٹائی میں کامیابی کا مکمل کریڈٹ کھلاڑیوں کو جاتا ہے جنہوں نے بہترین کارکردگی کا مظاہرہ کیا۔

میڈیا سے گفتگو کرتے ہوئے رشید ملک کا کہنا تھا کہ پاکستان میزبان ملک تھا اور اسی مناسبت سے منصوبہ بندی کی گئی تھی، جس کے مثبت نتائج سامنے آئے۔انہوں نے کہا کہ جب ٹیم بیرونِ ملک مقابلے کھیلنے جائے گی تو وہاں کے حالات اور کنڈیشنز کو مدنظر رکھتے ہوئے حکمت عملی ترتیب دی جائے گی۔رشید ملک نے اس عزم کا اظہار کیا کہ پاکستان مستقبل میں مزید بین الاقوامی ایونٹس کی میزبانی کے لیے مکمل طور پر تیار ہے۔ان کا کہنا تھا کہ جلد ہی سات آئی ٹی ایف جونیئر ٹورنامنٹس پاکستان میں منعقد ہوں گے اور شائقینِ ٹینس کو عالمی سطح کے کھلاڑی ایکشن میں نظر آئیں گے۔کپتان کے مطابق پاکستان میں ٹینس کے فروغ اور بین الاقوامی سرگرمیوں کی بحالی ایک خوش آئند پیش رفت ہے اور اس سے ملک کا مثبت تشخص اجاگر ہوگا۔