کرسی کا توازن قائم کر کے ٹائٹل واپس حاصل کرنے کا انوکھا کارنامہ

سیریل گینیز ورلڈ ریکارڈ شکن ڈیوڈ رش نے اپنی ٹھوڑی پر 1 گھنٹہ اور 20 منٹ تک کرسی کا توازن قائم کر کے اپنا کھویا ہوا ٹائٹل واپس حاصل کر لیا۔

امریکی ریاست آئیڈاہو سے تعلق رکھنے والے ڈیوڈ رش نے اس سے قبل 1 گھنٹہ اور 8 منٹ تک کرسی کا توازن قائم کر کے گینیز ورلڈ ریکارڈ قائم کیا تھا، جبکہ حال ہی میں ایک اور بیلنس ایکسپرٹ نے 1 گھنٹہ اور 19 منٹ تک یہ ریکارڈ اپنے نام کر لیا تھا۔

ڈیوڈ رش نے اپنی ویب سائٹ پر بتایا کہ گزشتہ چند مہینوں سے وہ خاص طور پر اپنی گردن کی برداشت دوبارہ بحال کرنے کی تربیت لے رہے تھے۔ انہوں نے کہا کہ یہ کام گردن، جبڑا اور ریڑھ کی ہڈی کے اوپری حصے پر مسلسل دباؤ ڈالتا ہے اور کرسی لگنے کے بعد کسی لمحے بھی آرام نہیں ملتا، ہر سیکنڈ میں فعال کنٹرول ضروری ہوتا ہے۔

گینیز ورلڈ ریکارڈز نے ڈیوڈ رش کی جانب سے جمع کرائے گئے شواہد کا معائنہ کرنے کے بعد تصدیق کی کہ یہ ریکارڈ دوبارہ ان کے نام ہو گیا ہے۔