ٹھوڑی پر سکیٹ بورڈ توازن کرنے کا انوکھا ریکارڈ

امریکا کے معروف ریکارڈ شکن ڈیوڈ رش نے اپنی ٹھوڑی پر سکیٹ بورڈ کو ایک گھنٹہ، 1 منٹ اور 36 سیکنڈ تک متوازن رکھ کر ایک اور گینیز ورلڈ ریکارڈ اپنے نام کر لیا ہے۔ 350 سے زائد عالمی اعزازات رکھنے والے ڈیوڈ رش نے بتایا کہ یہ چیلنج انتہائی تکلیف دہ تھا کیونکہ سکیٹ بورڈ کے کنارے نوکیلے ہوتے ہیں، تاہم انہوں نے ایک ہموار کنارے والے بورڈ کی مدد سے یہ ہدف حاصل کیا۔ ڈیوڈ رش کے مطابق انہیں جیسے ہی معلوم ہوا کہ اس کیٹیگری میں ابھی تک کوئی ریکارڈ موجود نہیں، انہوں نے اسے فوری طور پر قائم کرنے کا فیصلہ کیا۔ اس عجیب و غریب کارنامے کے بعد ان کے عالمی ریکارڈز کی فہرست میں ایک اور انوکھا اضافہ ہو گیا ہے۔