شاہین آفریدی کو ٹیسٹ سکواڈ سے باہر رکھنے پر سابق انگلش فاسٹ بولر کا حیرت کا اظہار

انگلینڈ کے سابق فاسٹ بولر ڈیرن گف نے پاکستان کرکٹ ٹیم کی جانب سے شاہین شاہ آفریدی کو انگلینڈ کے خلاف ٹیسٹ سیریز کے سکواڈ کا حصہ نہ بنانے پر شدید حیرت کا اظہار کیا ہے۔ ہیڈنگلے ٹیسٹ کے دوران گفتگو کرتے ہوئے ڈیرن گف نے کہا کہ انگلینڈ کی کنڈیشنز اور پاکستان کے نسبتاً ناتجربہ کار بولنگ اٹیک کے باوجود شاہین آفریدی جیسے معیاری بولر کو نظر انداز کرنا سمجھ سے بالاتر ہے۔ انہوں نے تسلیم کیا کہ شاہین ماضی میں فارم کے مسائل کا شکار رہے ہیں لیکن وہ اب بھی ٹیسٹ کرکٹ میں وکٹیں حاصل کرنے کی صلاحیت رکھتے ہیں۔ واضح رہے کہ ہیڈنگلے ٹیسٹ میں پاکستان کا بولنگ اٹیک انگلش بیٹرز کو روکنے میں ناکام رہا اور قومی ٹیم کو اننگز اور 103 رنز کی بھاری شکست کا سامنا کرنا پڑا۔