فلمی انداز میں بینک ڈکیتی، ڈاکو پولیس کو پتہ چلے بغیر سُرنگ کے راستے فرار

اٹلی کے شہر نیپلز میں ڈکیتی کی ایک انوکھی اور فلمی واردات پیش آئی ہے، جہاں مسلح ڈاکوؤں نے ایک مقامی بینک سے کروڑوں روپے مالیت کا سامان لوٹنے کے بعد پولیس کو چکمہ دے کر زیرِ زمین سرنگ کے ذریعے فرار ہونے میں کامیابی حاصل کر لی۔

اطلاعات کے مطابق، دن ساڑھے گیارہ بجے کے قریب تین نقاب پوش اور مسلح ڈاکو ‘فرینڈ کریڈٹ ایگریکول بینک’ میں داخل ہوئے اور وہاں موجود عملے اور صارفین سمیت 25 افراد کو یرغمال بنا لیا۔ ڈاکوؤں نے بینک میں موجود نقدی کے علاوہ درجنوں لاکرز کو بھی توڑ ڈالا اور قیمتی سامان تھیلوں میں بھر لیا۔ تقریباً دو گھنٹے تک بینک کے اندر موجود افراد ڈاکوؤں کے رحم و کرم پر رہے، جبکہ باہر کسی کو کانوں کان خبر نہ ہوئی۔

جب اطلاع ملنے پر پولیس موقع پر پہنچی تو بینک کا مرکزی دروازہ اندر سے بند تھا، جس پر اہلکاروں نے کھڑکی توڑ کر اندر داخل ہونے کا راستہ بنایا۔ پولیس کے اندر پہنچنے پر تمام یرغمالی زمین پر اوندھے منہ لیٹے ہوئے پائے گئے، تاہم ڈاکو وہاں سے غائب تھے۔ تلاشی کے دوران بینک کے اندر ایک خفیہ سرنگ دریافت ہوئی جو شہر کے گٹر لائن سسٹم تک جاتی تھی، ڈاکو اسی راستے سے باآسانی فرار ہونے میں کامیاب رہے۔

بینک انتظامیہ کا کہنا ہے کہ پولیس کی بروقت کارروائی سے تمام یرغمالی محفوظ رہے، تاہم لاکرز سے چوری ہونے والے سامان کی مالیت اور تفصیلات ابھی تک واضح نہیں ہو سکیں کیونکہ ان کا علم صرف لاکرز کے مالکان کو ہی تھا۔ پولیس نے 40 افسران اور سراغ رساں کتوں کی مدد سے علاقے میں سرچ آپریشن شروع کر دیا ہے اور جائے وقوعہ سے فنگر پرنٹس سمیت دیگر شواہد اکٹھے کیے جا رہے ہیں۔