جمہوریہ چیک کے چرچ سے سینٹ کی 800 برس پرانی کھوپڑی چوری

جمہوریہ چیک کے شہر پراگ سے قریباً 110 کلومیٹر شمال میں واقع جیبلونی وی پوڈجیسٹڈی کے ایک تاریخی چرچ میں چوری کی انوکھی اور افسوسناک واردات پیش آئی ہے، جہاں ایک نامعلوم شخص ڈسپلے بکس میں رکھی گئی 800 سال پرانی مقدس کھوپڑی چرا کر فرار ہو گیا۔ خیال کیا جاتا ہے کہ یہ کھوپڑی لیمبرک کے سینٹ زی ڈسلوا کی ہے، جو 1220 سے 1252 کے درمیان حیات تھیں۔ وہ اپنی سخاوت اور غریب پروری کے باعث جانی جاتی تھیں اور 1995 میں پوپ جان پال دوم نے انہیں باقاعدہ سینٹ (مذہبی پیشوا) کا درجہ دیا تھا۔ پولیس کے مطابق، یہ واقعہ اس وقت پیش آیا جب ایک شخص چرچ میں داخل ہوا اور موقع پا کر تبرک غائب کر دیا۔ سی سی ٹی وی کی ایک دھندلی فوٹیج بھی منظرِ عام پر آئی ہے جس میں سیاہ لباس پہنے ایک شخص کو بنچوں کے درمیان سے بھاگتے ہوئے دیکھا جا سکتا ہے، جس کے ہاتھ میں کوئی چیز موجود ہے۔ پولیس کا کہنا ہے کہ یہ سینٹ زی ڈسلوا کی وہی کھوپڑی ہے جو وہاں آنے والے زائرین کے لیے انتہائی مقدس تھی۔ پراگ کے آرچ بشپ سٹینسیلا پریبل نے واقعے پر گہرے دکھ کا اظہار کرتے ہوئے کہا کہ “یہ کھوپڑی نہ صرف تاریخی اہمیت کی حامل تھی بلکہ مذہبی اعتبار سے بھی بہت احترام رکھتی تھی۔ مجھے یقین نہیں آ رہا کہ کوئی دن دیہاڑے چرچ میں داخل ہو کر ایسی حرکت کر سکتا ہے”۔پولیس ترجمان کا کہنا ہے کہ شروع میں مشتبہ شخص کو مرد سمجھا جا رہا تھا، تاہم اب اس بات کا خدشہ بھی ظاہر کیا جا رہا ہے کہ وہ کوئی خاتون ہو سکتی ہے۔ پولیس سکیورٹی کیمروں کے مواد کا مزید باریک بینی سے جائزہ لے رہی ہے تاکہ اس “مقدس چوری” میں ملوث ملزم کا سراغ لگا کر کھوپڑی کو دوبارہ چرچ منتقل کیا جا سکے۔