پارسل کے نام پر واٹس ایپ ہیک کرنے والا نیا گروہ سرگرم

اسلام آباد: ملک میں سائبر کرائم کا ایک نیا اور خطرناک طریقہ سامنے آیا ہے جس میں جعل ساز کوریئر کمپنیوں کے نمائندے بن کر شہریوں کے واٹس ایپ اکاؤنٹس ہیک کر رہے ہیں اور ان کے دوستوں اور رشتہ داروں سے رقم بٹور رہے ہیں۔

سائبر سیکیورٹی ماہرین کے مطابق، جعل ساز گروہ شہریوں کو فون کر کے دعویٰ کرتا ہے کہ ان کا ایک انتہائی اہم پارسل آیا ہوا ہے، لیکن ڈیلیوری یا پتے کی تصدیق کے لیے انہیں ایک کوڈ بتانا ہو گا۔ جیسے ہی شہری اپنے موبائل پر موصول ہونے والا تصدیقی او ٹی پی (OTP) کوڈ کال کرنے والے کو بتاتے ہیں، ہیکرز ان کا واٹس ایپ اکاؤنٹ اپنے ڈیوائس پر منتقل کر لیتے ہیں۔

اکاؤنٹ پر مکمل کنٹرول حاصل کرنے کے بعد ہیکرز متاثرہ شخص کے رابطہ نمبرز (Contacts) پر ایمرجنسی اور فوری مالی مدد کے جھوٹے پیغامات بھیج کر پیسے مانگتے ہیں۔

ایف آئی اے سائبر کرائم ونگ نے شہریوں کو خبردار کیا ہے کہ وہ کسی بھی ان نون کالر کے ساتھ اپنا واٹس ایپ پن یا او ٹی پی کوڈ ہرگز شیئر نہ کریں اور اپنے واٹس ایپ میں ٹو سٹیپ ویریفیکیشن (Two-Step Verification) کا عمل فوری فعال کریں۔