امریکی ناکا بندی سے کیوبا میں پٹرول ختم، کئی علاقے تاریکی میں ڈوب گئے

ہوانا: امریکہ اور اسرائیل کے ایران پر حملوں اور امریکی بحری ناکابندی کے باعث کیوبا اس وقت تاریخ کے بدترین توانائی بحران کی لپیٹ میں آگیا ہے۔ ایندھن کی شدید قلت کے نتیجے میں ملک کے کئی حصے مکمل طور پر تاریکی میں ڈوب گئے ہیں، جس پر حکومت نے پٹرول اور بجلی کے شدید بحران کا اعتراف کرتے ہوئے عوام سے صبر و تحمل کی اپیل کی ہے۔کیوبا کے وزیرِ توانائی نے ہنگامی پریس کانفرنس میں انکشاف کیا کہ ملک میں تیل اور ڈیزل کے ذخائر مکمل طور پر ختم ہو چکے ہیں اور حکومت صرف مقامی سطح پر پیدا ہونے والی گیس اور خام تیل پر انحصار کر رہی ہے، جو ملکی ضروریات کے لیے ناکافی ہے۔ اس بحران کی وجہ سے مشرقی علاقوں میں لاکھوں افراد متاثر ہوئے ہیں جہاں روزانہ 19 گھنٹے تک بجلی غائب رہتی ہے۔ ہوانا سمیت مختلف شہروں میں عوام نے مسلسل لوڈشیڈنگ کے خلاف برتن بجا کر احتجاج کیا اور سڑکوں پر نکل کر حکومت سے بجلی کی بحالی کا مطالبہ کیا۔ کیوبا کے صدر نے اس صورتحال کا ذمہ دار امریکہ کو قرار دیتے ہوئے اسے “توانائی کا محاصرہ” قرار دیا ہے۔ ان کا کہنا ہے کہ امریکی پابندیوں اور تیل فراہم کرنے والے ممالک کو ملنے والی دھمکیوں نے بحران کو سنگین بنا دیا ہے۔ دوسری جانب، امریکی صدر ڈونلڈ ٹرمپ نے اشارہ دیا ہے کہ ایران کے بعد اب کیوبا کی باری ہے، جہاں ان کے بقول ایک امریکہ مخالف حکومت قائم ہے۔ اگرچہ امریکی وزیرِ خارجہ نے 100 ملین ڈالر امداد کی پیشکش کی ہے، تاہم شرط یہ رکھی گئی ہے کہ یہ رقم کیوبن حکومت کے بجائے کیتھولک چرچ کے ذریعے تقسیم کی جائے گی۔کیوبا کا بجلی کا نظام 40 سال پرانے تھرمل پاور پلانٹس پر منحصر ہے جو بار بار خرابی کا شکار ہو رہے ہیں۔ خوراک اور ادویات کی پہلے سے موجود قلت کے ساتھ اب توانائی کے اس بحران نے عوامی مشکلات میں بے پناہ اضافہ کر دیا ہے۔ جنوری سے اب تک امریکی سختی کے باعث صرف ایک روسی آئل ٹینکر ہی کیوبا پہنچ پایا ہے، جس سے ایندھن کی طلب اور رسد میں 2 ہزار میگاواٹ سے زائد کا فرق پیدا ہو گیا ہے۔