خاتون کا ہزاروں سانپ پالنے کا خطرناک کاروبار، سالانہ لاکھوں یوان آمدن

چین کے علاقے گوانگشی سے تعلق رکھنے والی 29 سالہ نوجوان خاتون چن نے روایتی شعبوں سے ہٹ کر ایک ایسا منفرد اور خطرناک کاروبار اپنایا ہے جس نے دنیا کو ورطہ حیرت میں ڈال دیا ہے۔ 1995 میں پیدا ہونے والی چن نے یونیورسٹی سے فارغ التحصیل ہونے کے بعد اپنے والد کے سانپ پالنے کے کام کو ایک بڑے کاروباری فارم میں تبدیل کر دیا ہے۔ آج وہ 60 ہزار سے زائد زہریلے سانپوں کی مالکن ہیں اور اس کاروبار سے سالانہ 10 لاکھ یوان (تقریباً 1.46 لاکھ امریکی ڈالر) سے زائد کما رہی ہیں۔

چن کے فارم میں 50 ہزار سے زائد انتہائی زہریلے ‘فائیو سٹیپ’ پِٹ وائپرز اور 10 ہزار کے قریب کوبرا سانپ موجود ہیں۔ یہ فارم نہ صرف تجارتی بنیادوں پر گوشت فراہم کرتا ہے بلکہ روایتی چینی ادویات اور سائنسی تحقیق کے لیے سانپ کا زہر، تیل اور پتا (Gallbladder) بھی سپلائی کرتا ہے۔