بچی کا اپنے دادا دادی کی قبروں کو چھوڑ کر جانے سے انکار

چین کے صوبے گوئیژو (Guizhou) کے علاقے لیوپان شوئی (Liupanshui) سے تعلق رکھنے والی ایک معصوم بچی کی اپنے مرحوم دادا دادی کے لیے والہانہ محبت نے سوشل میڈیا پر لاکھوں آنکھوں کو نم کر دیا ہے۔ وائرل ہونے والی ویڈیو میں دیکھا جا سکتا ہے کہ یہ بچی اپنے دادا دادی کی قبروں کے پاس بیٹھی ہے اور وہاں سے گھر واپس جانے سے صاف انکار کر رہی ہے۔

بچی کے والد، چن کے مطابق، اس کی دادی کا انتقال ستمبر 2025 میں ہوا تھا جبکہ دادا حال ہی میں مارچ میں چل بسے تھے۔ چونکہ والد اپنے روزگار میں مصروف رہتے تھے اور والدہ کو طبی مسائل کا سامنا تھا، اس لیے بچی کی پیدائش کے بعد سے تمام تر پرورش اس کے دادا دادی نے ہی کی تھی، جس کی وجہ سے وہ ان سے شدید جذباتی لگاؤ رکھتی ہے۔

ویڈیو میں دکھایا گیا ہے کہ بچی قبروں کے سامنے بیٹھ کر کیک کھاتی ہے اور جب والدین گھر چلنے کا کہتے ہیں تو وہ وہیں سونے کی ضد کرتی ہے۔ چن کا کہنا ہے کہ بچی اکثر انہیں قبروں پر لانے کا کہتی ہے اور وہاں پہنچ کر کہتی ہے کہ “میں ان کے پاس ہی سونا چاہتی ہوں”۔ معصوم بچی کی یہ معصومانہ مگر دردناک خواہش سن کر اس کے والدین بھی اپنے آنسو نہ روک سکے۔