چین نے 22 ہزار سے زائد ڈرونز ایک ساتھ اُڑا کر عالمی ریکارڈ بنالیا

چین نے ٹیکنالوجی کی دنیا میں اپنی برتری ثابت کرتے ہوئے ایک ہی وقت میں ہزاروں ڈرونز فضا میں اڑا کر نیا عالمی ریکارڈ قائم کر دیا ہے۔ صوبہ انہوئی کے شہر ہیفی میں چینی کمپنی ‘ای ہینگ ایگرٹ’ نے 22 ہزار 580 ڈرونز کے ذریعے آسمان پر روشنیوں کا ایسا جادو بکھیرا کہ دیکھنے والے دنگ رہ گئے۔ اس سے قبل بھی ریکارڈز چین ہی کے پاس تھے، مگر حالیہ مظاہرے نے پچھلے تمام ریکارڈز کو بڑے مارجن سے پیچھے چھوڑ دیا ہے۔

اس شاندار لائٹ شو کی اصل کامیابی اس کی جدید ترین “سوارم انٹیلی جنس” (Swarm Intelligence) ٹیکنالوجی تھی، جس نے مصنوعی ذہانت کی مدد سے اتنی بڑی تعداد میں ڈرونز کو ایک مربوط یونٹ کے طور پر کنٹرول کیا۔ اس ٹیکنالوجی کی بدولت ہزاروں ڈرونز نے کسی تصادم کے بغیر آسمان پر پیچیدہ تھری ڈی ڈیزائنز، چینی لالٹینیں اور شہر کے مناظر تخلیق کیے۔ ماہرین اس کامیابی کو صرف تفریح نہیں بلکہ دفاعی اور تکنیکی میدان میں چین کی بڑھتی ہوئی طاقت کی علامت قرار دے رہے ہیں۔

دفاعی تجزیہ کاروں کا کہنا ہے کہ ایک ہی سسٹم کے تحت اتنی بڑی تعداد میں ڈرونز کو کنٹرول کرنے کی صلاحیت مستقبل کے جنگی تصورات، جیسے کہ “ایئرئیل سیچوریشن اٹیک”، کو حقیقت میں بدل سکتی ہے۔ یہ نظام کم لاگت مگر کثیر تعداد میں ڈرونز استعمال کر کے کسی بھی جدید دفاعی ڈھانچے کو مشکل میں ڈال سکتا ہے، جو کہ عالمی دفاعی توازن کے لیے ایک اہم پیغام ہے۔