بیوی کو تنہا نہ چھوڑنے کیلئے شوہر بھی گہرے مین ہول میں گرگیا

چین کے صوبے شان ڈونگ کے علاقے ڈونگ یانگ میں ایک غیر معمولی واقعہ پیش آیا جہاں زخمی بیوی کو تنہا چھوڑنے کے بجائے شوہر نے بھی 5 میٹر گہرے مین ہول میں چھلانگ لگا دی۔ رپورٹس کے مطابق میاں بیوی سرسبز علاقے میں ٹڈے پکڑ رہے تھے کہ اندھیرے اور گیلی گھاس کے باعث خاتون کا پاؤں پھسل گیا اور وہ گہرے مین ہول میں جا گری، جس کے نتیجے میں وہ شدید زخمی اور حرکت کرنے سے قاصر ہو گئی۔ شوہر نے ایمرجنسی میں بیوی کو اکیلا چھوڑ کر جانے کے بجائے خود مین ہول میں اتر کر اس کی دیکھ بھال کی اور دونوں نے موبائل فون کے ذریعے ریسکیو حکام کو اطلاع دی۔ بعد ازاں فائر فائٹرز کی ٹیم نے موقع پر پہنچ کر حفاظتی رسیوں کی مدد سے دونوں کو بحفاظت باہر نکال کر طبی امداد کے لیے ہسپتال منتقل کر دیا۔