چین: کوئلے کی کان میں دھماکے، 90 افراد ہلاک، کئی زخمی

چین کے شہر چینگ زی میں واقع لیوشین یو کوئلہ کان میں گیس بھر جانے کے باعث ہونے والے ہولناک دھماکے میں ہلاکتوں کی تعداد بڑھ کر 90 ہو گئی ہے، جبکہ کئی افراد اب بھی لاپتہ ہیں۔ غیر ملکی میڈیا کے مطابق یہ افسوسناک واقعہ گزشتہ شام اس وقت پیش آیا جب کان کے اندر اچانک زہریلی گیس جمع ہو گئی، جس نے دیکھتے ہی دیکھتے ایک شدید دھماکے کی شکل اختیار کر لی۔ حادثے کے فوراً بعد ابتدائی طور پر 8 افراد کی ہلاکت کی تصدیق کی گئی تھی، تاہم جیسے جیسے ریسکیو آپریشن آگے بڑھا، ملبے سے مزید لاشیں نکلنے کے بعد ہلاکتوں کی تعداد میں ہولناک اضافہ ہو گیا اور متعدد زخمیوں کو تشویشناک حالت میں اسپتال منتقل کیا گیا ہے۔

چینی حکام کے مطابق حادثے کا شکار ہونے والے کئی مزدور اب بھی کان کے اندر پھنسے ہوئے ہیں جنہیں نکالنے کے لیے بڑے پیمانے پر امدادی سرگرمیاں چوبیس گھنٹے جاری ہیں۔ کان کنی کے اس مہیب حادثے پر گہرے دکھ کا اظہار کرتے ہوئے حکام نے واقعے کی اعلیٰ سطحی تحقیقات کا آغاز کر دیا ہے۔ چینی انتظامیہ نے واضح کیا ہے کہ کان میں حفاظتی انتظامات کی کمی اور غفلت برتنے کے پہلوؤں کا باریک بینی سے جائزہ لیا جا رہا ہے، اور اس ہولناک واقعے کے ذمہ دار پائے جانے والے عناصر کو قانون کے مطابق سخت ترین سزا دی جائے گی۔