امریکا کے شپ یارڈ میں دھماکا، ایک شخص ہلاک، 36 افراد زخمی

امریکی شہر نیویارک کے علاقے اسٹیٹن آئی لینڈ کے ایک شپ یارڈ میں زوردار دھماکے کے نتیجے میں ایک شخص ہلاک جبکہ 36 افراد زخمی ہو گئے ہیں۔ امریکی میڈیا رپورٹ کے مطابق یہ افسوسناک واقعہ شپنگ ڈاکس کے تہہ خانے میں اچانک آگ لگنے کے بعد پیش آیا، جہاں عملہ آگ بجھانے کی کوششوں میں مصروف تھا کہ اسی دوران اچانک ایک شدید دھماکا ہو گیا۔ نیویارک کے میئر ظہران ممدانی نے واقعے پر گہرے دکھ کا اظہار کرتے ہوئے کہا ہے کہ یہ ایک انتہائی پیچیدہ اور تیزی سے بدلتی ہوئی ہنگامی صورتحال تھی جس پر قابو پانے کے لیے تمام وسائل بروئے کار لائے گئے۔

فائر کمشنر للین بونسگنور نے واقعے کی تفصیلات بتاتے ہوئے میڈیا کو بتایا کہ دوپہر تقریباً ساڑھے تین بجے فائر ڈیپارٹمنٹ کو متعدد کالز موصول ہوئیں، جن میں اطلاع دی گئی کہ شپ یارڈ کے عقبی حصے میں واقع 150 فٹ چوڑے اور 150 فٹ لمبے دھاتی ڈھانچے کے تہہ خانے سے گہرا دھواں اٹھ رہا ہے اور وہاں دو ورکرز پھنسے ہوئے ہیں۔ فائر فائٹنگ اور ایمرجنسی میڈیکل سروسز کی ٹیمیں فوری کارروائی کرتے ہوئے محض چھ منٹ کے اندر جائے وقوعہ پر پہنچ گئیں، تاہم ریسکیو آپریشن شروع ہوتے ہی ایک زوردار دھماکا ہوا جس کی زد میں آ کر فائر ڈیپارٹمنٹ کے متعدد اہلکار اور چند شہری شدید زخمی ہو گئے، جبکہ ایک شخص موقع پر ہی دم توڑ گیا۔ اسپتال انتظامیہ کے مطابق زخمی ہونے والے کئی افراد کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔