2 سال پہلے امریکہ مردہ ملک تھا، اب ہر کوئی عزت کر رہا ہے: ٹرمپ

امریکی صدر ڈونلڈ ٹرمپ نے دعویٰ کیا ہے کہ دو سال قبل امریکا ایک مردہ ملک بن چکا تھا لیکن اب دنیا بھر میں اس کی عزت بحال ہو چکی ہے۔ میڈیا سے گفتگو اور مختلف تقاریب سے خطاب کرتے ہوئے امریکی صدر نے خارجہ امور اور ملکی دفاع پر کھل کر بات کی۔ انہوں نے کہا کہ امریکا کے پاس اس وقت دنیا کی سب سے طاقتور ترین فوج موجود ہے جس کا کوئی مقابلہ نہیں کر سکتا، جبکہ فیک نیوز چینلز جنگ سے متعلق مسلسل غلط اور گمراہ کن خبریں پھیلا رہے ہیں۔ ایران کے حوالے سے سخت موقف اپناتے ہوئے صدر ٹرمپ کا کہنا تھا کہ ہم نے ایرانی قیادت کو ختم کر دیا ہے اور اب ان کے پاس نہ تو ایئر فورس بچی ہے اور نہ ہی نیوی؛ ایران کسی صورت جوہری ہتھیار حاصل نہیں کر سکتا اور اب وہ امریکا کے ساتھ معاہدے کے لیے بے تاب ہے۔ انہوں نے واضح کیا کہ ایران میں وہی حکمتِ عملی اپنائی جا رہی ہے جو وینزویلا میں اختیار کی گئی تھی اور امریکی حملوں نے ایران کو شدید نقصان پہنچایا ہے۔

عالمی رہنماؤں اور معیشت پر بات کرتے ہوئے صدر ٹرمپ نے اپنے دورہِ چین کو تاریخی قرار دیا اور چینی صدر شی جن پنگ کو ایک ’اچھا آدمی‘ کہا۔ اس کے ساتھ ہی انہوں نے سعودی سرمایہ کاری کا تذکرہ کرتے ہوئے دعویٰ کیا کہ دو سال پہلے سعودی عرب امریکا میں محض 2 ٹریلین ڈالر کی سرمایہ کاری کر رہا تھا، جو ان کے دورِ حکومت میں بڑھ کر ریکارڈ 18 ٹریلین ڈالر تک پہنچ چکی ہے۔ تاہم، صدر ٹرمپ کو اندرونِ ملک عوامی ردعمل کا بھی سامنا کرنا پڑا؛ نیویارک میں ایک عوامی ریلی سے خطاب کے دوران مظاہرین نے دو مرتبہ مداخلت کرتے ہوئے ان کے خلاف شدید نعرے بازی کی، جس کے بعد انتظامیہ نے احتجاج کرنے والے افراد کو پنڈال سے باہر نکال دیا۔