نوابشاہ میں ایف آئی اے کی کارروائی، منشیات اور حوالہ ہنڈی میں ملوث 6 افراد گرفتار

فیڈرل انویسٹیگیشن ایجنسی نے نوابشاہ کے مختلف علاقوں میں کارروائیاں کرتے ہوئے منشیات اسمگلنگ اور حوالہ ہنڈی کے نیٹ ورک میں ملوث 6 ملزمان کو گرفتار کر لیا۔

ایف آئی اے حکام کے مطابق گرفتار ہونے والوں میں ایس ایس پی سانگھڑ کے دفتر کا ایک جونیئر کلرک بھی شامل ہے، جو مبینہ طور پر منشیات اسمگلنگ اور حوالہ ہنڈی کے غیر قانونی دھندے میں ملوث پایا گیا۔

حکام کے مطابق کارروائی کے دوران ایک ملزم سے اسلحہ، گاڑی، نقد رقم اور موبائل فونز برآمد کیے گئے۔

مزید بتایا گیا ہے کہ مجموعی طور پر ملزمان سے ایک کروڑ ننانوے لاکھ روپے نقدی برآمد کی گئی ہے۔

ایف آئی اے کے مطابق ملزمان کے قبضے سے متعدد اے ٹی ایم کارڈز، چیک بکس، لیپ ٹاپ اور ہارڈ ڈرائیوز بھی برآمد ہوئی ہیں۔

تمام ملزمان کے خلاف مقدمہ درج کر کے مزید تفتیش شروع کر دی گئی ہے۔