امریکہ میں گرین کارڈ حاصل کرنے کا عمل مزید سخت کر دیا گیا

ٹرمپ انتظامیہ نے امریکا میں مستقل رہائش (گرین کارڈ) حاصل کرنے کے قوانین کو مزید سخت کرتے ہوئے ایک نئی پالیسی نافذ کر دی ہے، جس کے تحت اب زیادہ تر درخواست گزاروں کو امریکا کے اندر رہ کر اسٹیٹس تبدیل کرنے کی اجازت نہیں ہوگی بلکہ انہیں اپنے ملک واپس جا کر ہی اپلائی کرنا ہوگا۔ امریکی شہریت اور امیگریشن سروسز (USCIS) کے حوالے سے سامنے آنے والی تفصیلات کے مطابق، مستقل رہائش کے خواہش مند غیر ملکی شہریوں کو اب عمومی طور پر امریکی محکمہ خارجہ کے ذریعے ملک سے باہر ہی سے اس عمل کا آغاز کرنا ہوگا۔ یو ایس سی آئی ایس کے ترجمان زیک کاہلر کا اس حوالے سے کہنا ہے کہ امریکا میں عارضی طور پر مقیم ایسے غیر ملکی جو گرین کارڈ حاصل کرنے کے خواہاں ہیں، انہیں اپنے وطن واپس جا کر ہی قانونی کارروائی مکمل کرنا ہوگی، اور صرف انتہائی غیر معمولی یا ہنگامی صورتحال میں ہی امریکا کے اندر رہتے ہوئے ‘ایڈجسٹمنٹ آف اسٹیٹس’ کی درخواست قبول کی جائے گی۔ اس نئی گائیڈ لائن سے امریکا میں موجود ہزاروں نان-امیگرینٹس براہِ راست متاثر ہوں گے، جن میں خاص طور پر بین الاقوامی طلبہ (انٹرنیشنل اسٹوڈنٹس)، عارضی ورکرز اور سیاح شامل ہیں۔