بچے کا اپنی جمع پونجی واپس لینے پر باپ کے خلاف مقدمہ

چین میں ایک بچے نے اپنی جمع پونجی واپس لینے کے لیے اپنے والد کے خلاف مقدمہ دائر کر دیا۔ شمالی چین کے صوبے ہینان کے شہر ژینگژو میں ایک والد نے برسوں قبل اپنے بچے شیاو ہوئی کے نام پر بینک اکاؤنٹ کھولا تھا اور اس میں بچے کی نام نہاد ’ریڈ اینویلپ منی‘ جمع کراتے رہے، جو قمری سالِ نو کے موقع پر ملنے والی روایتی رقم ہوتی ہے۔

تاہم، والد نے بچے کی اجازت کے بغیر ساری رقم نکال کر اپنی دوسری شادی کے اخراجات پر خرچ کر دی۔ اس وقت تک شیاو ہوئی تقریباً 80 ہزار یوآن (تقریباً 11 ہزار 700 امریکی ڈالر) جمع کر چکا تھا، جو اس عمر کے بچے کے لیے کافی بڑی رقم تھی۔

شیاو ہوئی نے والد سے اپنی جمع پونجی واپس مانگی، لیکن جواب ملا کہ یہ رقم زیادہ تر خاندان اور دوستوں کی طرف سے آئی تھی اور اسے صرف بالغ ہونے پر واپس کیا جائے گا۔ متعدد کوششوں کے بعد، شیاو ہوئی نے عدالت سے رجوع کیا۔

والد نے دلائل دیے کہ بطور قانونی سرپرست وہ رقم اپنے صوابدید کے مطابق استعمال کر سکتے ہیں اور مقدمہ دراصل بچے کی والدہ کی اکسانے پر دائر کیا گیا۔ تاہم، عدالت نے فیصلہ دیا کہ تحفے میں ملنے والی رقم قانونی طور پر شیاو ہوئی کی ذاتی ملکیت ہے اور والد نے اس حق کی خلاف ورزی کی۔

عدالت نے حکم دیا کہ والد تمام رقم بمعہ سود واپس کریں، جو مجموعی طور پر 82 ہزار 750 یوآن (تقریباً 12 ہزار 60 امریکی ڈالر) بنتی ہے۔