چین: بلاگر نے سِم کارڈز سے بھاری مالیت کا سونا اکٹھا کر لیا

چین سے تعلق رکھنے والے ایک بلاگر نے دعویٰ کیا ہے کہ اس نے سِم کارڈ چِپس اور دیگر برقی آلات سے 191.73 گرام سونا حاصل کر لیا ہے، جس کے بعد سوشل میڈیا پر اس کے طریقۂ کار پر بحث چھڑ گئی ہے۔

صوبہ گوانگ ڈونگ سے تعلق رکھنے والے بلاگر کے مطابق اس نے اسٹرانگ ایسڈ ڈِسولوشن اور الیکٹرولائٹک ری ڈکشن جیسے پیچیدہ کیمیائی طریقوں کے ذریعے یہ سونا اکٹھا کیا۔ بلاگر نے اس عمل کی ویڈیو بھی شیئر کی، جسے اس نے ’سِم الکیمی‘ (SIM Alchemy) کا نام دیا ہے۔

ویڈیو سوشل میڈیا پر وائرل ہوتے ہی صارفین کی بڑی تعداد نے حیرت اور دلچسپی کا اظہار کیا۔ ایک صارف نے کمنٹ کیا کہ دس سال تک محنت کرنے سے بہتر ہے کباڑ اکٹھا کیا جائے، جبکہ اس نے بلاگر سے یہ طریقہ سیکھنے کے لیے شاگرد بنانے کی درخواست بھی کی۔ ایک اور صارف نے لکھا کہ اس نے کبھی نہیں سنا تھا کہ سِم چپس کو بھی سونا بنانے کے لیے استعمال کیا جا سکتا ہے۔

دوسری جانب ماہرین نے اس دعوے پر سوالات اٹھاتے ہوئے کہا کہ ایک سِم کارڈ میں اوسطاً صرف 0.47 ملی گرام سونا استعمال ہوتا ہے، اور اس حساب سے 191 گرام سونا حاصل کرنے کے لیے تقریباً چار لاکھ سِم کارڈز درکار ہوں گے۔

ماہرین کی تنقید پر وضاحت دیتے ہوئے بلاگر کا کہنا تھا کہ اس نے صرف سِم کارڈز ہی نہیں بلکہ دیگر مواصلاتی برقی آلات میں موجود سونا چڑھی چِپس کو بھی اس عمل میں استعمال کیا ہے، جس کی وجہ سے اتنی مقدار میں سونا حاصل کرنا ممکن ہوا۔