وزیراعلیٰ سندھ نے ریلوے منصوبوں کیلئے 6.6 ارب روپے دینے کی منظوری دیدی

وزیراعلیٰ سندھ سید مراد علی شاہ اور وفاقی وزیر ریلوے حنیف عباسی کے درمیان ملاقات میں سندھ کے ریلوے نظام کو جدید بنانے سے متعلق اہم فیصلے کیے گئے۔ ملاقات کے دوران سندھ میں 858 کلو میٹر طویل ریلوے نیٹ ورک کی اپ گریڈیشن اور 63 ارب 26 کروڑ روپے سے ریلوے انفرا اسٹرکچر کی بحالی پر تبادلہ خیال کیا گیا۔

وزیراعلیٰ سندھ سید مراد علی شاہ نے کہا کہ وفاقی حکومت کے تعاون سے سندھ کے عوام کے لیے جدید ریلوے منصوبے شروع کیے جا رہے ہیں۔ انہوں نے بتایا کہ سندھ حکومت 6 جدید ٹرینیں خریدنے پر غور کر رہی ہے، جبکہ ان منصوبوں سے صوبے کی تقریباً 67 فیصد آبادی مستفید ہوگی۔

ملاقات میں کوٹری سے دادو، دادو سے لاڑکانہ، حیدرآباد سے میرپورخاص، روہڑی سے جیکب آباد اور حیدرآباد سے بدین سمیت 6 اہم ریلوے روٹس کی بحالی کا بھی فیصلہ کیا گیا۔

وفاقی وزیر ریلوے حنیف عباسی نے کہا کہ روہڑی اسٹیشن کی عالمی معیار پر تزئین و آرائش کے لیے ایک ارب روپے مختص کیے گئے ہیں، جبکہ وزارت ریلوے 6 جدید ٹرینوں سے متعلق تمام تفصیلات سندھ حکومت کو فراہم کرے گی۔

ان کا کہنا تھا کہ وفاق اور سندھ حکومت کا یہ اشتراک پاکستان ریلوے کی تاریخ کا نیا باب ثابت ہوگا۔ سندھ کو ماحول دوست اور معاشی ترقی کو فروغ دینے والا جدید ریلوے نظام فراہم کیا جائے گا، جبکہ سندھ حکومت کو ہر ممکن تکنیکی تعاون اور ’رائٹ آف وے‘ بھی دیا جائے گا۔