وزیراعلیٰ پنجاب نے سب سے بڑی ٹریکٹر سکیم کا ریکارڈ قائم کر دیا

وزیراعلیٰ پنجاب مریم نواز شریف نے 30 ہزار ٹریکٹرز پر مشتمل چیف منسٹر ٹریکٹر پروگرام کے ذریعے ملک کی تاریخ کی سب سے بڑی ٹریکٹر اسکیم کا ریکارڈ قائم کر دیا ہے۔ اس پروگرام کا مقصد پنجاب کے کاشتکاروں کو معاشی خودمختاری فراہم کرنا اور زرعی پیداوار میں نمایاں اضافہ کرنا ہے۔

پہلے مرحلے میں 50 سے 75 ہارس پاور کے 10 ہزار ٹریکٹرز کاشتکاروں کو فراہم کیے جا چکے ہیں، جبکہ دوسرے مرحلے میں 75 سے 85 ہارس پاور کے مزید 10 ہزار ٹریکٹرز کی قرعہ اندازی مکمل ہو گئی ہے اور فراہمی کا عمل جاری ہے۔ حکومت پنجاب کی جانب سے ہر ہائی ہارس پاور ٹریکٹر پر 10 لاکھ روپے سبسڈی دی جا رہی ہے، جس کے لیے مجموعی طور پر 10 ارب روپے مختص کیے گئے ہیں۔

حکومتی ذرائع کے مطابق ٹریکٹر اسکیم کا تیسرا مرحلہ جنوری میں شروع کیا جائے گا، جس کے تحت 50 سے 55 ہارس پاور کے ٹریکٹرز کے لیے وسط جنوری سے درخواستیں طلب کی جائیں گی، جبکہ ہائی ٹیک فارم میکانائزیشن فنانسنگ پروگرام کے تحت 100 سے 120 ہارس پاور کے بڑے ٹریکٹرز بلاسود قرضوں پر فراہم کیے جائیں گے۔

اس موقع پر وزیراعلیٰ مریم نواز شریف کا کہنا تھا کہ کاشتکاروں کو ٹریکٹر کی فراہمی معاشی خودمختاری اور زیادہ پیداوار کی ضمانت ہے، حکومت پنجاب کسانوں کو بوائی سے لے کر فصل کی فروخت تک ہر ممکن تعاون فراہم کر رہی ہے اور عملی اقدامات کے ذریعے زرعی ترقی کو یقینی بنایا جا رہا ہے۔