’چیٹوزارڈ‘ ریکارڈ قیمت میں نیلام

نیویارک: گینیز ورلڈ ریکارڈز نے تصدیق کی ہے کہ ‘چیٹوزارڈ’ (پوکیمون کے کردار ‘چیزرڈ’ کی شکل والے چیٹو) نے نیلامی کی دنیا میں ایک نیا عالمی ریکارڈ قائم کر دیا ہے۔ یہ انوکھا چیٹو سنیک (Cheeto) اپنی منفرد شکل کی وجہ سے ہزاروں ڈالرز میں فروخت ہوا ہے۔

ادارے کے مطابق، ‘گولڈن آکشنز’ نے مارچ 2025 میں اس ‘چیٹوزارڈ’ کی نیلامی منعقد کی، جہاں اسے 87 ہزار 840 ڈالر (تقریباً ڈھائی کروڑ پاکستانی روپے سے زائد) کی ریکارڈ قیمت پر فروخت کیا گیا۔ محض تین انچ لمبا یہ چیٹو ایک خاص طور پر تیار کردہ ‘چیٹوزارڈ’ پوکیمون کارڈ پر نصب ہے اور اسے ایک شفاف حفاظتی ڈبے میں محفوظ کیا گیا ہے۔

گولڈن آکشنز کے ہیڈ آف کنسائنمنٹ، ڈیو امرمنت کا کہنا ہے کہ ان کا ادارہ نایاب اور اپنی نوعیت کی منفرد اشیاء جمع کرنے کے لیے مشہور ہے، اور ‘چیٹوزارڈ’ ان میں سے ایک بہترین مثال ہے۔ سوشل میڈیا پر اس نیلامی کو حیرت اور دلچسپی کے ساتھ دیکھا جا رہا ہے، جہاں لوگ محض ایک کھانے کی چیز کی اتنی بھاری قیمت پر حیران ہیں۔