جیل میں زندگی گزارنے کا تجربہ حاصل کرنے کی پیشکش

بھارتی ریاست تلنگانہ کی تاریخی چنچل گوڑا سینٹرل جیل نے عام شہریوں کے لیے ایک اچھوتا اور دلچسپ پروگرام ’فیل دی جیل‘ (Feel the Jail) متعارف کرایا ہے، جس کے تحت اب کوئی بھی شخص فیس ادا کر کے قیدیوں جیسی زندگی کا عملی تجربہ کر سکے گا۔ جیل حکام کے مطابق اس پروگرام کے تحت شہری 12 یا 24 گھنٹے جیل میں گزار سکتے ہیں۔ 24 گھنٹے کے تجربے کے لیے 2 ہزار انڈین روپے جبکہ 12 گھنٹے کے لیے ایک ہزار روپے فیس مقرر کی گئی ہے۔ اس دوران شرکا کو مخصوص بیرکوں میں رکھا جائے گا، انہیں وہی سادہ کھانا دیا جائے گا جو عام قیدی کھاتے ہیں اور ان کے روزمرہ کے معمولات بھی جیل کے سخت قواعد و ضوابط کے مطابق ہوں گے۔ حکام کا کہنا ہے کہ اس منصوبے کا بنیادی مقصد نوجوانوں کو جیل کی کٹھن زندگی، قانون کی حکمرانی اور آزادی کی حقیقی قدر سے آگاہ کرنا ہے۔ ڈی جی پی تلنگانہ جیل سومیا مشرا کے مطابق، بہت سے لوگ فلموں کے زیرِ اثر جیل کو سنسنی خیز سمجھتے ہیں، لیکن یہ پروگرام انہیں حقیقت دکھائے گا کہ قید کی زندگی کتنی محدود ہوتی ہے۔ یہ منصوبہ سنگا ریڈی کے کامیاب ’ون ڈے جیل ایکسپیرینس‘ سے متاثر ہو کر شروع کیا گیا ہے۔اسی موقع پر چنچل گوڑا میں ایک نئے جیل میوزیم کا بھی افتتاح کیا گیا ہے، جہاں نظام دور سے لے کر جدید دور تک کے اصلاحی نظام کی تاریخ پیش کی گئی ہے۔ میوزیم میں تاریخی ہتھکڑیاں، بیڑیاں اور نامور شخصیات جیسے بھکتا راماداسو اور داسارتھی کرشنماچاریولو سے متعلق معلومات رکھی گئی ہیں۔ افتتاحی تقریب میں گورشیو پرتاپ شکلا نے خطاب کرتے ہوئے کہا کہ جدید جیلیں اب صرف سزا کی جگہ نہیں بلکہ اصلاح اور بحالی کے مراکز بن چکی ہیں۔

سوشل میڈیا پر اس پروگرام کے اعلان کے بعد شہریوں کی جانب سے ملے جلے ردعمل کا اظہار کیا جا رہا ہے، جہاں کئی صارفین اسے ایک منفرد اور سبق آموز تجربہ قرار دے رہے ہیں۔