کینیڈا: چوری میں ملوث لومڑی پکڑی گئی

البرٹا: کینیڈا میں چوری کی ایک ایسی مضحکہ خیز اور دلچسپ واردات سامنے آئی ہے جس نے پولیس اہلکاروں سمیت سوشل میڈیا صارفین کو بھی ہنسنے پر مجبور کر دیا، جہاں بار بی کیو (Barbecue) کا سامان چوری کرنے والا کوئی انسان نہیں بلکہ ایک شاطر لومڑی نکلی۔ کینیڈا کے صوبے البرٹا کی پولیس کو ایک شہری کی جانب سے گھر کے پچھواڑے سے باربی کیو کا سامان اور کھانے پینے کی اشیاء چوری ہونے کی اطلاع ملی، لیکن جب پولیس اہلکار باقاعدہ کارروائی کے لیے موقع پر پہنچے تو یہ دیکھ کر دنگ رہ گئے کہ اصل مجرم ایک لال لومڑی تھی، جس نے اپنے منہ میں ڈھیروں ہاٹ ڈاگز (Hot Dogs) دبا رکھے تھے۔

رائل کینیڈین ماؤنٹڈ پولیس (RCMP) نے اس انوکھی تفتیش کی تفصیلات سوشل میڈیا پر شیئر کرتے ہوئے انتہائی مزاحیہ انداز اختیار کیا۔ پولیس کے مطابق، افسران پیر کے روز ‘کروزنیسٹ پاس’ کے علاقے میں ایک ایسے مشکوک ملزم کی تلاش میں پہنچے تھے جس کی شناخت شہریوں نے یوں بتائی تھی کہ “ملزم کے سرخ بال ہیں، قد چھوٹا ہے اور اس نے بھاری و موٹی کھال والا کوٹ پہن رکھا ہے”۔

آر سی ایم پی نے بتایا کہ جائے وقوعہ پر پہنچنے کے بعد جب مختصر تفتیش کا آغاز کیا گیا، تو مذکورہ ‘روپوش ملزم’ قریبی جھاڑیوں میں چوری کا مال اور ثبوت چھپانے کی ناکام کوشش کرتے ہوئے رنگے ہاتھوں پکڑا گیا۔ پولیس نے اس شاطر چور لومڑی کی ایک تصویر بھی جاری کی ہے، جس میں وہ منہ میں ہاٹ ڈاگز ٹھونسے معصومیت سے کیمرے کی طرف دیکھ رہی ہے۔ کینیڈین پولیس نے اکرامِ مسلم و حیوانیت کے تحت روایتی سختی کے بجائے نرمی کا مظاہرہ کیا اور بتایا کہ جرم ثابت ہونے کے باوجود ملزم کو “بغیر کسی شرط” کے فوری طور پر رہا کر دیا گیا ہے۔