پائلٹ کا روپ دھار کر سینکڑوں مرتبہ مفت سفر کرنے والا شخص گرفتار

امریکی حکام نے انکشاف کیا ہے کہ ٹورنٹو کے 33 سالہ سابق فلائٹ اٹینڈنٹ ڈلاس پوکورنک نے خود کو کمرشل پائلٹ اور فضائی عملے کا رکن ظاہر کرکے متعدد امریکی ایئر لائنز سے سینکڑوں مفت پروازیں حاصل کیں۔

ڈلاس پوکورنک کو پاناما سے گرفتار کر کے امریکہ کے حوالے کیا گیا، جہاں وفاقی عدالت نے ان پر آن لائن دھوکہ دہی کے الزامات عائد کیے۔ ملزم نے سنہ 2017 سے 2019 تک فلائٹ اٹینڈنٹ کے طور پر کام کیا، اور بعد ازاں جعلی ایمپلائی آئی ڈی کارڈز کے ذریعے دیگر ایئر لائنز میں پائلٹوں کے لیے مختص مفت ٹکٹ حاصل کرتا رہا۔

امریکی استغاثہ کے مطابق ڈلاس پوکورنک نے کئی بار کاک پٹ میں موجود اضافی نشست (Jump Seat) پر بیٹھنے کی بھی درخواست کی، جو عام طور پر ڈیوٹی سے فارغ پائلٹوں کے لیے مخصوص ہوتی ہے۔ الزامات کے مطابق متاثرہ شہروں میں ہونولولو، شکاگو اور فورٹ ورتھ شامل ہیں۔

یہ واقعہ ہالی ووڈ فلم ’کیچ می اِف یو کین‘ کی کہانی کی یاد دلاتا ہے، جس میں مرکزی کردار پائلٹ کا روپ دھار کر ایئر لائنز کے ساتھ دھوکہ دہی کرتا ہے۔ امریکی مجسٹریٹ جج نے ڈلاس پوکورنک کو حراست میں رکھنے کا حکم دیا ہے۔