کینیڈین ہاکی ٹیم کا پاکستان آنے پر اصولی اتفاق، دوطرفہ سیریز کی راہ ہموار

پاکستان ہاکی فیڈریشن (پی ایچ ایف) کے مطابق کینیڈا کی قومی ہاکی ٹیم نے پاکستان کا دورہ کرنے پر اصولی طور پر رضامندی ظاہر کر دی ہے، جس سے دونوں ممالک کے درمیان دوطرفہ ہاکی سیریز کے انعقاد کی راہ ہموار ہو گئی ہے۔ پی ایچ ایف نے بتایا کہ کینیڈین ہاکی فیڈریشن اپنے کھلاڑیوں اور حکام کے ہمراہ اگلے برس جنوری یا فروری میں پاکستان کا دورہ کرے گی۔ دورے کے میچز کی تعداد، تاریخوں اور دیگر تمام تر انتظامی امور کو دونوں فیڈریشنز باہمی مشاورت سے حتمی شکل دیں گی۔ اس کے علاوہ، پی ایچ ایف ملک میں بین الاقوامی ہاکی کی مکمل بحالی کے لیے مزید تین دیگر ممالک کی ٹیموں کو بھی پاکستان لانے کے لیے مذاکرات کر رہی ہے، جن کی آمد رواں سال کے اختتام یا اگلے سال کے پہلے دو ماہ میں متوقع ہے۔