انشورنس کیلئے ریچھ بن کر حملہ کرنیوالے تین افراد کو سزا

کیلیفورنیا: امریکی ریاست کیلیفورنیا میں ریچھ کا روپ دھار کر اپنی ہی مہنگی گاڑیوں کو نقصان پہنچانے اور انشورنس کمپنیوں سے لاکھوں ڈالر کا مطالبہ کرنے والے تین افراد کو عدالت نے قید کی سزا سنا دی ہے۔ الفیا زکرمن، روبن تمرازین اور واہے مرادخانین کو انشورنس فراڈ کا مرتکب قرار دیتے ہوئے 180 دن کی قید کی سزا سنائی گئی ہے، جبکہ اس گروہ کے چوتھے رکن ارارت چرکینین کی سماعت ستمبر میں ہوگی۔
غیر ملکی خبر رساں ادارے کے مطابق، ان افراد نے رولز رائس سمیت تین مختلف قیمتی گاڑیوں پر “ریچھ کے حملے” کی جعلی ویڈیوز بنا کر تین الگ الگ کمپنیوں کو جمع کرائیں۔ ان کا دعویٰ تھا کہ جنگلی ریچھ نے ان کی گاڑیوں کے اندرونی حصے کو بری طرح چیر پھاڑ کر نقصان پہنچایا ہے۔
انشورنس کمپنیوں کے تفتیشی ماہرین کو اس وقت شک ہوا جب انہوں نے سی سی ٹی وی فوٹیج کا باریک بینی سے جائزہ لیا:
ماہرین نے نوٹ کیا کہ رولز رائس پر حملہ کرنے والا “ریچھ” جانوروں کے بجائے بالکل انسانوں کی طرح چل رہا تھا۔ جب یہ ویڈیوز جنگلی حیات کے ماہرین کو دکھائی گئیں تو انہوں نے تصدیق کی کہ ریچھ کبھی اس طرح حرکت نہیں کرتا۔ بعد ازاں تلاشی کے دوران ملزمان کے گھر سے ریچھ کا مصنوعی کاسٹیوم اور پنجوں کے نشانات بنانے والا آلہ بھی برآمد ہوا۔
کیلیفورنیا انشورنس ڈیپارٹمنٹ کے کمشنر ریکارڈو لارا نے اس حوالے سے کہا کہ “جو بات پہلی نظر میں ناقابلِ یقین لگ رہی تھی، وہی حقیقت نکلی۔” انہوں نے مزید واضح کیا کہ انشورنس فراڈ ایک سنگین جرم ہے جس کا بوجھ عام صارفین کو بڑھتی ہوئی قیمتوں کی صورت میں اٹھانا پڑتا ہے۔ ان کا کہنا تھا کہ کوئی بھی جرم اتنا معمولی نہیں ہوتا کہ اس کی مکمل تحقیق نہ کی جائے۔
اس گروہ نے جعلی دعووں کے ذریعے مجموعی طور پر 1 لاکھ 41 ہزار ڈالر سے زائد کی رقم بٹورنے کی کوشش کی تھی، تاہم جدید فرانزک تحقیقات نے ان کی “ریچھ والی چال” کو بے نقاب کر دیا۔