امریکا: سروے کے دوران 25 لاکھ سال قدیم دانت دریافت

امریکی ریاست کیلیفورنیا میں خطرے سے دوچار ریڈ لیگڈ مینڈک کے مسکن کی بہتری کے لیے سروے میں مصروف ماہرِ ارضیات بریجڈ لنچ نے اتفاقاً 25 لاکھ سال قدیم ماسٹوڈون (قدیم ہاتھی نما جانور) کا ایک محفوظ دانت دریافت کر لیا ہے۔ بریجڈ لنچ ایک نالے کا جائزہ لے رہی تھیں کہ انہیں چٹانوں کی تہہ میں ایک عجیب الخلقت چیز نظر آئی، جس کی انہوں نے تصویر بنا کر مزید تحقیق کے لیے ماہرین سے رابطہ کیا۔

ماہرینِ آثارِ قدیمہ اور سائنس دانوں کے مطابق یہ دانت ایک ‘پیسیفک ماسٹوڈون’ کا ہے جو اپنی موت کے وقت تقریباً 40 برس کا تھا۔ بریجڈ لنچ نے اس دریافت کو اپنے سائنسی کیریئر کا سب سے حیران کن تجربہ قرار دیا ہے۔ ماہرین کا کہنا ہے کہ یہ اتفاقی دریافت لاکھوں سال قبل کیلی فورنیا کے خطے میں پائے جانے والے نایاب قدیم جانوروں، ان کے رہنے سہنے کے انداز اور اس دور کے ماحولیاتی حالات کو سمجھنے میں اہم پیشرفت ثابت ہوگی۔