کیلیفورنیا کے ساحل پر اُٹھنے والے پُراسرار بلبلوں کا معمہ حل ہوگیا

امریکی ریاست کیلیفورنیا کے ہرموسا بیچ کے ساحل پر رواں ہفتے پُراسرار بلبلوں کے اُٹھنے نے مقامی رہائشیوں میں تجسس پیدا کر دیا اور مختلف قیاس آرائیاں جنم لیں، جن میں بلیو فِن ٹیونا، زیرِ آب سرگرمی یا خلائی مخلوق کے امکان شامل تھے۔

تاہم، تحقیق سے یہ بات سامنے آئی کہ اصل میں اس علاقے میں کیلیفورنیا سے ایشیا تک فائبر آپٹکس کی نئی لائن کی تنصیب جاری تھی۔

اس کام کی نگرانی کرنے والے رِک ڈیوِینے نے بتایا کہ کمپنی میٹا آئندہ مہینوں میں ایک اضافی لائن نصب کرنے کا منصوبہ بنا رہی ہے اور اس کے لیے موجودہ لائن میں ہوا بھری جا رہی ہے تاکہ یہ یقینی بنایا جا سکے کہ ڈکٹ صحیح کام کر رہا ہے۔