خلائی مخلوق جیسی نظر آنی والی دیوقامت سُنڈی دنیا بھر میں توجہ کا مرکز بن گئی

قدرت کے کارخانے میں ان گنت عجیب و غریب اور حیرت انگیز مخلوقات موجود ہیں، جن میں سے ایک ’کیبیج ٹری موتھ‘ (Cabbage Tree Moth) نامی سُنڈی بھی ہے۔ یہ سنڈی اپنی دیو قامت جسامت اور انتہائی خوفناک ساخت کی وجہ سے ان دنوں دنیا بھر میں شدید توجہ کا مرکز بنی ہوئی ہے۔

خبر ایجنسی کے مطابق، تقریباً 70 ملی میٹر لمبی اور بے حد موٹی جسامت والی یہ سُنڈی دیکھنے میں انتہائی منفرد ہے۔ یہ بنیادی طور پر دو انوکھے رنگوں میں پائی جاتی ہے، جس میں گہرے سیاہ جسم پر سفید کانٹے یا پھر سرخ جسم پر پیلے کانٹے بنے ہوتے ہیں۔ اس کی اس عجیب و غریب بناوٹ کو پہلی نظر میں دیکھ کر کسی خلائی مخلوق (ایلین) کا گمان ہوتا ہے۔

اگرچہ اس سنڈی کے پورے جسم پر نوکیلے کانٹوں کی ڈھال موجود ہے جو اسے انتہائی ڈراؤنا اور وحشت ناک بناتی ہے، لیکن ماہرین کا کہنا ہے کہ یہ دیوقامت سنڈی انسانوں کے لیے بالکل بھی نقصان دہ یا زہریلی نہیں ہے۔ حقیقت یہ ہے کہ اس مخلوق کے جسم پر نظر آنے والے نوکیلے کانٹے دراصل اندر سے انتہائی نرم اور اسفنج جیسے ہوتے ہیں۔ اس کے جسم کے چمکدار اور شوخ رنگ قدرت کے فراہم کردہ ایک خاص دفاعی نظام کا حصہ ہیں، تاکہ شکاری پرندے اور دیگر جانور اسے خطرناک یا زہریلا سمجھ کر اس سے دور رہیں اور یہ محفوظ رہ سکے۔