بونی کپور کی بیٹی رشتہ ازدواج میں منسلک، تصاویر سامنے آگئیں

امور بالی ووڈ پروڈیوسر بونی کپور کی بیٹی اور اداکار ارجن کپور کی بہن انشولا کپور اپنے دیرینہ ساتھی روہن ٹھاکر کے ساتھ رشتہ ازدواج میں منسلک ہو گئی ہیں۔

بھارتی میڈیا کے مطابق، شادی کی اس پروقار تقریب میں کپور خاندان کے افراد اور انتہائی قریبی دوستوں نے شرکت کی۔ شادی کا سب سے جذباتی لمحہ وہ تھا جب انشولا کپور کی آنجہانی والدہ مونا شوری کپور کی تصویر شادی کی رسومات کے دوران بالکل سامنے رکھی گئی، جس نے دولہا دلہن سمیت تقریب میں موجود تمام مہمانوں کو آبدیدہ اور جذباتی کر دیا۔

انشولا کپور نے اپنے انسٹاگرام اکاؤنٹ پر شادی کی خوبصورت تصاویر مداحوں کے ساتھ شیئر کیں، جن میں ان کی سوتیلی بہنیں جھانوی کپور اور خوشی کپور شادی کی تمام تر رسومات اور انتظامات سنبھالتی نظر آئیں۔ سندور لگانے کی اہم رسم کے دوران بھی جھانوی اور خوشی دلہا دلہن کے ساتھ ہی موجود رہیں۔

دوسری جانب، بھائی ارجن کپور نے بھی شادی کی خوبصورت یادگار تصاویر سوشل میڈیا پر شیئر کیں۔ ان تصاویر میں سے ایک میں انشولا اپنے بھائی ارجن کو گلے لگائے ہوئے نظر آئیں، جبکہ ایک اور یادگار تصویر میں پوری کپور فیملی اس خوشی کے موقع پر ایک ساتھ پوز دیتے ہوئے دکھائی دی۔

یاد رہے کہ انشولا کپور اور روہن ٹھاکر کی ملاقات سال 2022 میں ایک ڈیٹنگ ایپ کے ذریعے ہوئی تھی۔ اس کے بعد دونوں نے مارچ 2023 میں اپنے رشتے کا باضابطہ اعلان سوشل میڈیا پر کیا، جبکہ اکتوبر 2025 میں یہ خوبصورت جوڑا منگنی کے بندھن میں بندھا تھا۔