امریکا میں ہوٹل نے کیک کاٹنے کے 30 ہزار روپے سے زائد چارج کرلیے

امریکا میں جنوبی کیلیفورنیا کے مشہور اور مہنگے علاقے ‘بیورلی ہلز’ کے ایک ہوٹل کی جانب سے باہر سے لائے گئے کیک کو کاٹنے پر بھاری فیس چارج کیے جانے کا معاملہ سوشل میڈیا پر وائرل ہو گیا ہے اور اس پر ایک نئی بحث چھڑ گئی ہے۔ غیر ملکی میڈیا کے مطابق، ایک معروف خاتون فوڈ انفلوئنسر نے اپنے دوستوں کے ہمراہ مذکورہ ہوٹل کے روف ٹاپ (چھت) پر بنے ریسٹورنٹ میں کھانا کھایا، جہاں انہوں نے ایک تقریب کے سلسلے میں باہر سے لایا گیا کیک بھی کاٹا۔

فوڈ انفلوئنسر نے اپنے انسٹاگرام اکاؤنٹ پر ایک ویڈیو شیئر کرتے ہوئے بتایا کہ جب کھانے کا بل آیا تو وہ یہ دیکھ کر دنگ رہ گئیں کہ ہوٹل انتظامیہ نے صرف کیک کاٹنے کی مد میں 110 امریکی ڈالر (جو پاکستانی روپوں میں تقریباً 30 ہزار 641 روپے بنتے ہیں) چارج کر لیے تھے۔ خاتون نے ویڈیو میں باقاعدہ بل کی رسید دکھاتے ہوئے شکوہ کیا کہ انتظامیہ نے میز پر موجود فی شخص کے حساب سے 10 ڈالر چارج کیے، جبکہ اس فیس کے بارے میں انہیں آرڈر لینے سے پہلے یا کیک کاٹتے وقت بالکل آگاہ نہیں کیا گیا تھا، جو کہ سراسر ناانصافی ہے۔

انفلوئنسر کی جانب سے ویڈیو پوسٹ کیے جانے کے بعد سوشل میڈیا صارفین نے ہوٹل انتظامیہ کو کڑی تنقید کا نشانہ بنایا اور اس فیس پر حیرت کا اظہار کیا۔ ویڈیو وائرل ہونے اور عوامی دباؤ بڑھنے کے بعد ہوٹل انتظامیہ بھی اپنا مؤقف سامنے لانے پر مجبور ہو گئی۔ ہوٹل انتظامیہ نے اپنے بیان میں افسوس کا اظہار کرتے ہوئے کہا کہ ہمیں صدمہ ہے کہ ہمارے مہمانوں کو کیک کاٹنے کی فیس کے بارے میں پہلے سے صحیح طور پر گائیڈ نہیں کیا گیا، یہ ہمارے سروس کے معیار کے خلاف ہے اور کیک میز پر لاتے ہی فیس کے بارے میں بتانا لازمی تھا۔ انتظامیہ نے خاتون سے معذرت کرتے ہوئے نہ صرف ان کی کیک فیس واپس کرنے کی یقین دہانی کرائی، بلکہ مستقبل کے لیے اس فیس کو فی بندہ 10 ڈالر سے کم کر کے 5 ڈالر کرنے کا بھی باقاعدہ اعلان کر دیا ہے۔