بیلجیئم میں سیوریج کے لیے کھدائی کے دوران مزدوروں کو سونا مل گیا

بیلجیئم کے شہر ڈینڈرمونڈ میں ایک زیرِ تعمیر عمارت میں سیوریج سسٹم کے نئے پائپ بچھانے کے لیے کھدائی کرنے والے مزدوروں کو اچانک ایک کروڑ ڈالر (تقریباً 90 لاکھ یورو) سے زائد مالیت کا سونے کا خزانہ مل گیا۔ مشرقی فلیمش علاقے میں ایک مقامی فلاحی ادارے ‘CAW ایسٹ فلینڈرز’ کی ملکیت اس عمارت کی مرمت کے دوران، تہہ خانے کی دیواروں میں چھپائی گئی تقریباً 50 سونے کی سلاخیں (گولڈ بارز) اور سونے کے نایاب سکے برآمد ہوئے۔ مزدوروں نے حیرت اور بے یقینی کا اظہار کرتے ہوئے بتایا کہ وہ محض عام کھدائی کر رہے تھے اور انہیں وہاں اتنے بڑے خزانے کی موجودگی کا بالکل اندازہ نہیں تھا۔

سونا ملنے کے بعد تعمیراتی عملے نے فوری طور پر پولیس کو اطلاع دی، جس کے بعد پولیس نے تمام سونا تحویل میں لے کر فہرست تیار کی اور اسے وفاقی حکومت کی انتہائی محفوظ تجوری میں منتقل کر دیا۔ واقعہ کی خبر پھیلتے ہی ‘خزانے کے متلاشی’ افراد کی بڑی تعداد نے سائٹ کا رخ کرنے کی کوشش کی، جس پر پولیس نے تعمیراتی مقام کی باڑ بندی کر کے عوام کو دور رہنے کی تنبیہ کی ہے۔ قانون کے مطابق اس بات کا حتمی فیصلہ ہونا باقی ہے کہ اس تاریخی و قیمتی خزانے کا قانونی مالک کون بنے گا اور آیا یہ رقم فلاحی ادارے یا دریافت کرنے والوں کو ملے گی یا نہیں۔