89 سالہ خاتون 27ویں منزل سے ریلنگ کے سہارے نیچے اتر آئی

چین کے دارالحکومت بیجنگ میں ایک انتہائی حیران کن اور دل دہلا دینے والا واقعہ پیش آیا ہے جہاں ایک 89 سالہ معمر خاتون اپنے اپارٹمنٹ کے کمرے میں بند ہونے کے بعد مدد نہ ملنے پر 27ویں منزل سے کھڑکی کے راستے باہر نکل آئیں اور ریلنگ کے سہارے نیچے اترنا شروع کر دیا۔ میڈیا رپورٹس کے مطابق، خاتون حادثاتی طور پر کمرے میں محبوس ہو گئی تھیں اور ان کا موبائل فون دوسرے کمرے میں ہونے کی وجہ سے وہ کسی سے رابطہ کرنے میں ناکام رہیں، جس پر انہوں نے خود ہی باہر نکلنے کا خطرناک فیصلہ کیا۔

عمارت کے عملے اور سکیورٹی گارڈ نے جب ایک معمر خاتون کو ایئر کنڈیشنر کی حفاظتی ریلنگ کے سہارے لٹکتے دیکھا تو فوری طور پر پولیس اور فائر فائٹرز کو اطلاع دی۔ خاتون ہمت ہارنے کے بجائے مسلسل نیچے اترتی رہیں اور جب تھکاوٹ کی وجہ سے رکیں تو وہ 21ویں منزل تک پہنچ چکی تھیں، جو زمین سے تقریباً 50 میٹر کی بلندی پر واقع ہے۔ ریسکیو ٹیم نے موقع پر پہنچ کر انتہائی مہارت کے ساتھ کارروائی کی؛ انہوں نے 21ویں منزل کے اپارٹمنٹ کی ریلنگ کا ایک حصہ کاٹ کر عارضی پلیٹ فارم بنایا اور خاتون کو حفاظتی رسیوں سے باندھ کر محفوظ کیا۔

فائر فائٹرز نے خاتون کو بلندی پر ہی پانی اور جیکٹ فراہم کی تاکہ ان کی حالت سنبھل سکے، جس کے بعد تقریباً 20 منٹ کے آرام کے بعد ایک اسٹریچر کی مدد سے عارضی پل بنا کر انہیں بحفاظت اپارٹمنٹ کے اندر منتقل کر لیا گیا۔ خوش قسمتی سے اس پورے خطرناک ایڈونچر کے دوران خاتون کو کوئی جسمانی چوٹ نہیں آئی، تاہم وہ شدید تھکن اور صدمے کی حالت میں تھیں۔ سوشل میڈیا پر اس واقعے کی ویڈیوز وائرل ہونے کے بعد صارفین خاتون کی غیر معمولی ہمت پر حیرت کا اظہار کر رہے ہیں۔