بنگلادیش: بھیک مانگ کر گزارہ کرنے والے شخص کا 21 شادیوں کا دعویٰ

بنگلہ دیش میں بھیک مانگ کر اپنا اور اپنے بچوں کا پیٹ پالنے والا ایک 35 سالہ شخص 21 شادیوں کے حیران کن اور عجیب و غریب دعوے کے بعد سوشل میڈیا اور مقامی میڈیا پر کثرت سے وائرل ہو گیا ہے۔ خبروں کے مطابق، مورو میاں نامی اس شخص کا دعویٰ ہے کہ وہ اب تک 21 خواتین سے رشتہ ازدواج میں منسلک ہو چکا ہے، تاہم دلچسپ بات یہ ہے کہ اتنی بڑی تعداد کی وجہ سے اسے اپنی تمام بیویوں کے نام تک یاد نہیں ہیں۔

مورو میاں نے اپنی اس غیر معمولی ازدواجی زندگی کی تفصیل بتاتے ہوئے کہا کہ اس نے اپنی زندگی میں کبھی کسی خاتون کو خود شادی کی پیشکش نہیں کی، بلکہ خواتین خود اس کے پاس شادی کا پیغام لے کر آتی تھیں۔ اس کا کہنا ہے کہ وہ اخلاقی طور پر کسی خاتون کی خواہش یا پیشکش کو ٹکرا نہیں سکتا تھا، اسی لیے جو بھی پیغام آیا اس نے قبول کر لیا اور دیکھتے ہی دیکھتے شادیوں کی تعداد 21 تک پہنچ گئی۔ اتنی بڑی تعداد میں شادیوں کا دعویٰ کرنے والا یہ شخص اس وقت بھی ایک ہی کمرے کی خستہ حال جھونپڑی میں رہتا ہے اور روزمرہ کی ضروریات پوری کرنے کے لیے بھیک مانگنے پر مجبور ہے۔ تاہم، مقامی حکام اور میڈیا کی جانب سے مورو میاں کی ان تمام 21 شادیوں کی آزادانہ تصدیق نہیں ہو سکی ہے اور اسے ایک وائرل دعویٰ ہی قرار دیا جا رہا ہے۔